خناقة بشرى ونجيب ساويرس Vs محمدرمضان: أغاني وصراع حيوانات

25/12/2018


خناقة بشرى ومحمد رمضان بدأت لما بشرى نشرت إمبارح على قناتها على "يوتيوب" أغنية "الكوبرا"، واللي كلماتها كلها موجهة للفنان محمد رمضان كرد منها على كليبات "نمبر وان" و"الملك" وبالتزامن مع قرب طرح أغنيته الجديدة "المافيا"، بشرى افتتحت الأغنية بجملة "لو فاكر نفسه إنه لوحده جوه النادي/ ده ملوك كتير دخلوا قبله من سنين/ كل الكلام يا عيني قاله على الفاضي/ ده محصلش رقم 70"، أما اللزمة بتاعت الأغنية فكانت "هولا هوبا/ ملك الغابة لدغته كوبرا/ هولا هولا هولا هوبا أسدك يابا هبشته قطة".

الكلمات تقريبا مكتوبة بالحرف عن محمد رمضان وبتنصحه يكون متواضع أكتر ويبعد عن التعالي والتفاخر بالنجاح ومحاولة الحفاظ عليه "لو دامت قبلك لغيرك/ ما كانت وصلت ليك/ لو ربك إداك محبة/ ليه تضيعها كدا بإيديك/ بطل بقى شغل إحداث/ عيب حتى ده إنت ابن ناس"، لكن بخلاف الكلمات الكليب كان فيه تفاصيل كتيرة بصرية بتلعب على نفس المفهوم، زي الأسد اللي ظهر متخدر في الكليب والقطة بتقرب منه (على أساس بتخربشه يعني)، وزي الحزام والفستان اللي لبستهم بشرى وكان مكتوب عليهم رقم "70"، وزي الاستيدج اللي كان عليه تلزيونات كتيرة شبه التلفزيونات اللي ظهرت في كليب "نمبر وان"، ده غير طبعا الشخص اللي طلع في نص الكليب وبيمثل دور محمد رمضان وداهن وشه أسمر وبيعمل نفس حركات إيديه "نمبر وان".

الخناقة بدأت بعد الكليب مباشرة، لما نجيب ساويرس عمل "تويت" للأغنية وكتب مقطع منها "ملك الغابة عضته قطة"، اللي مش معروف أوي، إن نجيب ساويرس هو منتج الأغنية، لأن في نهاية "الكليب" ظهر لوجو شركة Gemini Media وهي شركة تابعة لـ Gemini Development المملوكة لنجيب ساويرس.

محمد رمضان رد على الكلام ده ونشر فيديو على صفحته الرسمية على "فيس بوك" تجميعة لجهوره وهو بيغني أغنية "ملك الغابة"، وعلق على الفيديو "الباشا اللي سَرَّح القطة.. جمهوري بيقوله.. التاج على راسي يالا يا بروطة"، واللي أغلب المتابعين فسروه عل إنه تعليق على إنتاج شركة نجيب ساويرس للأغنية وإنه عملها شير كمان.

"ساويرس" بعدها نشر توضيح عن أغنية بشرى، ونشر من "ويكيبيديا" سكرين شوت عن الـ Diss Track أو الـ Diss Song واللي هي أغنية بتهاجم شخص بعينه أو بتهاجم "تراك" تاني، و هي نوعية مشهورة في genre الهيب هوب.

Comments: