دول بتسمح للموظفات بالحصول على إجازة مدفوعة في أيام الدورة الشهرية

26/12/2018


الناس غالبا أو بعض الرجالة بالتحديد بيستغربوا البنت اللي ممكن تاخد أجازة وقت الدورة الشهرية، أو لما تبقى مش قادرة تنزل أو تخرج أو لما مثلا توقف الرياضة اللي بتلعبها، بمعني أصح بيستغربوا إنها ممكن توقف حياتها أيام الدورة الشهرية، لكن فعليا هي آلام وتعب صعب على حد إنه يستحمله، ده غير المود السيء اللي أغلب السيدات بتعاني منه، ومن أعراض ألم الدورة الشهرية، الغثيان والإسهال وألم في الحوض والبطن والضهر، والألم دي بتبقى أكتر عند الستات اللي بيعانوا من دورة شهرية مش منتظمة، وخصوصا الستات اللي وزنهم قليل.

لكن في حكومات ودول قدرت تصدق ده وتقدره كمان، وكان أولهم الهند وبعض مدن الصين واليابان وكوريا الجنوبية وإندونسيا وتايوان وزامبيا وشركة Nike، ده حسب  (شتيرن) الألمانية وموقع التلفزيون الألماني DW، وكمان صحيفة "نيويورك تايمز" الأمريكية.

وفي مارس 2017، طلع مقترح في إيطاليا إنها تطبق نظام بيسمح للستات إنهم ياخدوا أجازة شهرية مدفوعة الأجر لمدة 3 أيام، والقانون كمان بيسمح للسيدات يمشوا بدري في أوقات الدورة الشهرية أو ياخدوا الأيام دي كلها أجازة.

بعض التقارير بتقول إن الحصول على أجازة مرهون بحالات معينة بتكون فيها الأيام دي بتسبب معاناة لبعض السيدات بشكل أكبر من سيدات تانيين، زي حالات عسر الطمث، وإن البنت/ الست في الوقت ده لازم تقدم شهادة أو أوراق من دكتور لصاحب الشغل إنها بتعاني وقت الدورة الشهرية، ولازم كمان تجدد الورقة دي كل سنة عشان تبقى صالحة.

القانون الإيطالي كان فيه تفصيلة مهمة، وهي إن الأجازات بتاعت "البيريود" مش هتأثر على الأجازات المرضية اللي المفروض الموظفات بتاخدها، وبالتالي مش مسموح لأصحاب الشغل إنهم يميزوا بين الأجازات العادية وإجازة الدورة الشهرية، بمعنى إن أجازة الدورة الشهرية من حق الموظفة كل شهر ومش بتتخصم من رصيد أجازاتها المرضية.

 وأكدت "واشنطن بوست" الأمريكية إن نسبة الستات اللي بتشتغل في أوروبا عموما 72 % لكن في إيطاليا بالتحديد 62%، وعشان كده من مصلحة البلد إنها تقدم إجازات مدفوعة الأجر للموظفات في الوقت ده، وده معناه إن حصول الستات على أجازات في الفترة دي، أحسن ليهم ولإنتاجية الشغل كمان، التساؤل بقى.. هل ممكن يظهر قانون في أي بلد عربي مشابه للقانون ده؟ وهل هيفضل الجدال بتاع "الست من حقها ولا مش من حقها تاخد أجازة وقت الدورة الشهرية؟".


 

Comments: