٧ نصايح من الملياردير إيلون ماسك لزيادة كفاءة الموظفين: لو الاجتماع  مش مهم سيبه وامشي

27/12/2018

بيتقال إن نجاح الشركة أو المؤسسة اللي الشخص شغال فيها أو نجاح الأشخاص اللي بيشتغلوا أصلا جزء كبير منه بيبقى بسبب مديرهم، عقلية المدير وطريقة إدارته للشركة وأسلوب التعامل مع الموظفين من أهم أسباب النجاح، ومن أكبر الأمثلة على كده "إيلون ماسك"، الملياردير الكندي الأمريكي مؤسس شركة "تسلا" لصناعة العربيات الكهربائية ومؤسس "سبيس إكس"، بعت إيميل للموظفين في الشركة في شهر أبريل اللي فات بعنوان "الدقة، التطور، الربح" وقالهم فيه 7 نصايح عشان يطور قواعد المؤسسة ويشجعهم على الإنتاجية الأفضل، في إطار خطة "تسلا" لمضاعفة إنتاجها لـ 6 آلاف عربية أسبوعيا، ودي كانت نصايح "ماسك":

1- لو حاسس إن الإجتماع اللي إنت قاعد فيه ده مش بيضيف لك، اطلع منه وسيبه وامشي عشان الإجتماعات الكبيرة بتبقى آفة في الشركات الكبيرة وممكن تضيع وقتك

2- بلاش الاجتماعات المتكررة، لو مفيش حاجة طارئة ماتعملش اجتماعات متكررة، وبمجرد ما الأمر الطارئ ده ينتهي ماتكررش الاجتماعات

3- مش لازم تستخدم الكلمات المنمقة والمصطلحات المعقدة اللي ملهاش لازمة في مسار الكلام، إنت مش لازم تبقى حافظ قاموس كامل عشان تشتغل، ماتوقفش حركة الشغل عشن المصطلحات، المهم إن المعنى يوصل

4- تاني، ماتدخلش أي اجتماع ولا تكمل أي مكالمة مالهاش قيمة بالنسبالك، وده مش عيب، العيب هو إنك تضيع وقتك ووقت غيرك

5- التواصل بين أفراد الشركة لازم يكون أسرع ويبقى واصل بين أقل عدد من النقط أو الموظفين عشان المهمة أو الـ Task يتنفذ، مش لازم التسلسل الوظيفي، المفروض الموظفين يتكلموا بحرية وبشكل مباشر مع اللي عايزينه، وأي مدير هيحاول يفرض سيطرة التسلسل الوظيفي يروح يشتغل في أي حته تانية

6- لو أي قاعدة من قواعد الشركة شايف إنها سخيفة أو هزلية، قول عليها عشان تتغير

7- لو عندك أي اقتراحات ممكن تطور نظام الشغل أو يحمسك عشان تشتغل، ابعتها على طول

في النهاية، "ماسك" قال في الميل للموظفين "شكرا لكونكوا فريق عمل ناجح، وبتصنعوا المعجزات، اللي بتعملوه مهم جدا، إحنا هنواصل شغل بالنهار وبالليل من أجل هدف عظيم".

Comments: