أغرب أعياد العالم: عيد ضرب الجيران.. وحرب الطماطم

27/12/2018

الصورة التقليدية للأعياد بتكون في الزينة والأكل والبهجة اللي بتيجي مع العيد، لكن مش كل الأعياد بتلعب نفس الدور في حياتنا، في أعياد فيها أكل لكن مش للناس لأ دي للحيوانات، وأعياد تانية الناس بتستحمى بالطين وغيرها من الأعياد الغريبة اللي هنشوفها في الموضوع ده، وهي الأعياد اللي رصدها موقع List25.

مهرجان تنكو
مهرجان "ماتشو تنكو" التقليدي أو عيد ضرب الجيران، ودة العيد اللي بيعتقد فيه البوليفيين إن ضرب الجيران بيجيب ليهم الحظ، وكمان بيزود محصول زراعتهم بمكافئة من الآلهة.


بوفيه القرد
في شهر فبراير في تايلاند، وتحديدا قرية لوببوري، كان بيتم الاحتفال بالقرود، لكنها كانت بتتجمع وتخطف الأكل من الناس، فقرروا في سنة 1989 أنهم يحتضنوا القرود ويقدموا ليهم الأكلات المختلفة، ومن الوقت بقى ثابت عندهم، عيد بوفيه القرد.


عيد حرب الطماطم
عيد الطماطم اللي بيخلي عشرات الآلاف من الإسبانيين والسياح يتجمعوا في آخر يوم أربع من شهر أغسطس كل سنة، في مدينة بونول، الناس بتتجمع في المدينة دي وتبدأ حرب الطماطم، ممكن يكون العيد ده دلوقتي شكل من أشكال البهجة والفرحة لكن أول مرة احتفلوا بالعيد ده علشان شكل من أشكال الاعتراض على النظام.

يوم الوز
العيد اللي لغاية دلوقتي مش لاقيين ليه سبب، كل اللي معروف عن العيد ده أنه من 350 سنة لحد دلوقتي بيتجمع الأسبان في قوارب لاصطياد الوز، وبيحاولوا يقطعوا راس الوزة وهي متعلقة على شجرة.

عيد بونزا بوتلير
العيد ده فكرته قايمة على إن عدد اليوم يتوافق مع عدد الشهر، مثلا 5 مايو أو 4 أبريل، وهو عيد موجود في أستراليا

عيد الصمت
على عكس كل الأعياد اللي بيكون فيها رقص وغنا، كان عيد اسمه "نيابي"، وهو العيد اللي بيصوم فيه سكان المقاطعة عن الكلام أو الخروج من البيت أو عمل أي أنشطة، ومع الصمت السكان بيعملوا حاجة واحدة بس إنهم يحرقوا التماثيل الموجودة في المعابد علشان يتخلصوا من الأرواح الشريرة اللي بتكون في المكان.

عيد الحشرات
في يوم 21 من شهر سبتمبر كل سنة، بتحتفل ولاية كارولينا الشمالية في الولايات المتحدة الأمريكية بعيد الحشرات، والهدف من العيد ده إن الناس تعرف على ثقافة أكل الحشرات أو المأكولات اللي بتكون الحشرات مكون من مكوناتها، وفي العيد ده الناس بتاكل عدد الأكل اللي بيكون فيه حشرات.

عيد القش
العيد ده بتحتفل بيه بريطانيا كل سنة في يوم 7 يناير، وهو اليوم اللي بيوافق بداية السنة الزراعية، كان العيد موجود من زمان لكن السكان بطلوا يحتفلوا بيه لحد سنة 1980 السنة اللي رجعوا يحتفلوا بالعيد ده تاني، ومن مظاهر الاحتفال إن راجل يلبس هدوم من القش بتغطي جسمه كله، ويلف المدن كلها علشان ياخد أكل وفلوس من البيوت

عيد الاستحمام بالطين
العيد ده بتحتفل بيه كوريا في بداية موسم الصيف، بتبدأ الاحتفالات في مدينة "بوريونج" بحرب الطين، وبدايته كانت من شركات التجميل لما حبت تسوق لمنتجاتها اللي مصنوعة من الطين يعني مش بيرجع لمناسبة قديمة.

عيد الفجل
في المكسيك في يوم 23 ديسمبر من كل سنة، الناس في المكسيك بتنحت على رؤوس الفجل أشكال جميلة، وبترجع قصة العيد ده لسنة 1897 في السنة دي مكنش فيه مكونات لإنتاج الحلوى، فالمزارعين نحتوا أشكال جميلة على رؤوس الفجل من الوقت ده ظهر العيد وفضل مكمل

Comments: