أسوأ 11 ألم كل البشر بيحسوا بيهم

27/12/2018

أكيد الألم بالنسبة للبشرية كلها شيء غير مرغوب فيه ومحدش بيحبه، لكن درجات الألم بتبقى مختلفة غالبا هتبقى جربتهم بكل أنواعهم، لكن فيه ناس بالنسبة لها الحقنة مثلا من أسوأ أشكال الألم اللي ممكن يتعرضوا لها، فكل شخص له قايمة من الألم اللي بيبعد بايده وسنانه عنهم، بالنسبة لموقع 25 list عملوا قايمة بأسوأ الآلام اللي الشخص بيجربها:

1- شوكة الخشب:

الخشب زي ما يكون وحش مخادع، لو ماستخدمتهوش بطريقة صح هتطلع منه شوكة أو شظايا صغيرة كده تدخل في صوابعك، وغالبا الوجع كله بيبقى لما تضغط عليها أو لما تيجي تخرجها، خصوصا لو مش معاك ملقاط وهتطلعها بدبوس.

2- آلات الألم:

غالبا الألم ده اختياري، لكن الآلات دي بتعمل ألم للرجالة بنفس درجة ألم الولادة، على اليوتيوب

كان فيه رجالة بتعيط فعلا من كتر الألم.

3- ركبتك لما تتخبط في طرف الطرابيزة:

غالبا أول ما رجلك بتعدي من قدام طرابيزة قصيرة، هتلاقيها بتتخبط تلقائي وبالذات في ركبتك في "بوز" الطرابيزة، بس الحمد لله الألم ده بيختفي بعد دقيقة تقريبا، المهم إن ياريت تبطل تشتم الكائن الحي ده لأن إنت اللي مش مركز وهو ملوش ذنب في الخبطة.

4- كسر العضم:

غالبا الشخص اللي إيده أو رجله بتتكسر وقت ما بيحصل الكسر ممكن صوته يوصل للمحافظة اللي جنبه.

5- حصوات الكلى:

لما حصوات الكلى بتبقى بتنزل، بتسبب ألم في منطقة الضلوع بالمناطق المحيطة بيها، وممكن تنزل بدم كمان.

6- البوكس في الوش (لكمات):

لو هتدخل أي خناقة وفيه نسبة 10% إنك تضرب في وشك، يا ريت تتجنبها أحسن، لإنها مابتوجعش الوش بس هو إحساس إن فيه نار مسكت في وشك كله، وغير كده كمان بتأذي الـ "ego"

7- خبطة الكوع:

من أسواء الخبطات اللي ممكن تحصل للواحد عشان بتبقى على غفلة، وغير كده هو بيبقى إحساس بالكهرباء لمدء دقيقة كده، مفيش أي حاجة ممكن تعالجه غير إنك تستنى.

8- صباع رجلك الصغير:

أكيد ده مش محتاج نقول عليه، لكن بيبقى فيه مغناطيس بينه وبين أي جماد ممكن تعدي من جنبه سواء كان باب أو ترابيزة أو كومودينو، الخبطة فيه بتشل ثواني كده معدودة وبعد كده بترجع تتعامل مع الناس عادي.

9- الضرب على الرجل المنملة:

لو رجلك منملة ده لوحده إحساس سيء لإنك بتبقى محتاج تستنى لحد ما تعدي الوقت ده، ولو حد ظريف طبعا قرر إنه يحاول يهزر معاك ويضربك عليها أو يلمسها عموما بيبقى الموضوع مؤلم أكتر.

10- قرصة النحلة:

أكيد القرص عموما مش مفضل بالنسبة لأي حد، لكن قرصة النحلة بتبقى صعبة خصوصا إن ذنب النحلة بيفضل في مكان القرصة، فكر 100 مرة قبل ما تهد خلية نحل.

11- ألم الولادة:

لما تبصي في وش إبنك أو بنتك الملائكي هتحسي بنوع  من الدفى في قلبك، بعد كده ممكن تفتكري الألم والتعب اللي حسيتي بيهم عشان يجوا العالم ده، وبعد كده غالبا هتصرخي لما تدوسي على مكعباتهم في الأرض.

Comments: