أسباب علمية للخيانة الزوجية.. دوافع مش مبررات

30/12/2018

الخيانة فعل غير مقبول لا اجتماعيا ولا دينيا أيا كان نوع الخيانة إيه، بالأخص لو كانت الخيانة دي شريك لشريكته أو العكس، من يومين ظهر "ثريد" على "تويتر" بعت فيه ناس مجهولين لشخص عن خيانتهم وبرروا فيه خيانة الشريك، بعض الأشخاص اللي برروا كانوا شايفين إن كان عندهم أسباب تدفعهم للخيانة، وفيه منهم اللي شاف إنها غلطة وندم عليها، وفيه منهم اللي شاف إنها بقت صفة أو عادة فيه خلاص مش قادر يتخلص منها، موقع Psychology Today المتخصص في الصحة النفسية، عمل قايمة بالأسباب العلمية المبنية على دراسات، اللي بتؤدي لارتكاب الأشخاص فعل الخيانة الزوجية:

أولا: أسباب فردية:

هي أسباب راجعة للشخص نفسه اللي بيرتكب الخيانة، والأبحاث عرفت مجموعة من الأسباب اللي ممكن تخلي الشخص يرتكب الخيانة زي:

1- النوع: الرجالة عندهم قابلية أكبر للخيانة، بسبب هرمون التيستوستيرون المسؤول عن رغبتهم القوية إنهم يمارسوا الجنس

2- الشخصية: الشخصيات اللي ضميرهم أضعف، والأشخاص اللي بيعانوا من عدم تقبل نفسهم هما أكتر الأشخاص عرضة إنهم يرتكبوا الخيانة.

3- التدين والميول السياسية: الأشخاص المتدينين أو اللي عندهم ميول سياسية محافظة بيقى ميلهم للخيانة أقل، وده بسبب صرامة قيمهم.

ثانيا: أسباب مرتبطة بالعلاقة

فيه ناس بتخون شريكها بسبب مشاكل في العلاقة نفسها، وبالنسبة للأشخاص دي فوجودهم في علاقة سوية بيقلل احتمالية خيانتهم، الأبحاث بتقول إن العلاقات المليانة خناقات وعدم توافق في الجنس وطابعها الأساسي عدم الرضا بتبقى عرضه أكتر للخيانة، وكمان العلاقة كل ما كان أطرافها بينهم فرق اجتماعي أو ثقافي أو من حيث الشخصية كل ما هيبقوا عرضة للخيانة أكتر.

ثالثا: أسباب ظرفية

ممكن يكون الشخص مش خاين ولا شخصيته فيها صفات بتخليه عنده استعداد للخيانة، لكنه بيتعرض لظروف بتخليه يرتكب الخيانة، زي إنه قابل شخص انجذب له  أكتر، أو إنه بيقضي وقت طويل مع طرف تاني غير الشريك، وعموما الأشخاص اللي عايشين في الأماكن الحضرية عرضة أكتر للخيانة من اللي عايشين في الريف الأفكار اللي فيها مساحة انفتاح أكبر من الأفكار الموجودة في الريف.

إزاي ممكن تحافظ على علاقتك من الخيانة؟

في الأول اتكلم مع شريكك وعرفوا مفهوم الخيانة بالنسبة لكم، واتفقوا عليه لأن الخيانة مفهومها بيختلف من شخص للتاني، من الأسهل أصلا إن يبقى فيه اتفاق وحدود واضحة بينكم من الأول، طبعا في كل العالم وعند كل الناس ممارسة الجنس مع حد تاني غير شريكك أو شريكتك فهي خيانة لكن في تفاصيل بسيطة ممكن طرف يشوفها خيانة والتاني لا، فمحتاجين تتفقوا على قواعد زي هل الخروج مع زميل في الشغل تتغدوا سوا ده خيانة ولا لا؟، وهل الكلام مع الجنس الآخر عنك على السوشيال ميديا مثلا خيانة ولا لا؟ وهكذا يعني.

عموما لو إنت شخص عانيت من الخيانة، عملتها أو كنت ضحية فيها ممكن تطلب مساعدة من دكتور نفسي أو من ناس "بروفيشنال"، ومش بالضرورة لو ارتكبت الخيانة، يبقى إنت شخص خاين، المهم إنك تاخد قرارإنك تبطل ده، لأن الخيانة فعل مؤذي ومدمر للطرف الآخر.

Comments: