علميا.. أحسن وأسوأ أوقات تشرب فيها قهوة على مدار اليوم

30/12/2018

فيه نوع من الناس بيفتحوا عينيهم مع كوباية القهوة، ولو فات ساعة من غير ما يشربوا قهوتهم فهما برضه بيبقوا لسه نايمين، الأشخاص دي القهوة والبن بالنسبة لهم إدمان، وبالرغم من كده الصبح مش هو الوقت المثالي لشرب القهوة خالص، في مدونة لـ" ستيفن إل ميلر" على موقع شركة القوة العالميةjavapresse  قال إن الأشخاص اللي بيصحوا من السرير على طول عشان يعملوا القهوة صحتهم مابتكونش كويسة، طبعا دي حاجة الشخص مش هيحب يصدقها أوي، لكن ماحدش هيقدر ينفي أو يحارب الكلام العلمي أو الأبحاث العلمية، عشان كده هنقولك إيه هي أحسن الأوقات اللي ممكن تشرب فيها القهوة، وإيه هي أسوأ الأوقات وفقا لـ"ميلر".

و"ميلر" هو باحث بيدرس كيفية تفاعل الأدوية مع الجسم عموما، وفي التدوينة دي بيتكلم عن الساعة البيولوجية، وبيقول في الدراسة إن إيقاعك اليومي بيشتغل 24 ساعة وبينظمه الضوء اللي بيدخلك على سبيل المثال، زي مثلا لما تخرج في الشمس بتحس بالنشاط والحيوية، لكن لما تقعد في مكان ضلمة بتحس بالكسل، بيتم تحديد كل حاجة من النوم والجوع والصحيان وكل ده على أساس الساعة البيولوجية.

أول ما بتصحي جسمك بيفرز هرمون الكورتيزول، وهو الهرمون اللي بيتفرز مع زيادة الأدرينالين أو مع التوتر أو لما جسمك بيكون مرهق، الكورتيزول كمان بيخليك فايق ومركز وبيكون له دور كبير في العمليات البيولوجية، وكل الأشخاص بيفرز عندهم هرمون الكورتيزول طبيعي في الفترة بين 8 و9 الصبح، وده معناه إن مفعول الكافيين بيضيع في الوقت ده على الأرض وحتى لو ماحستش بده.

عشان كده لما بتشرب كافيين الصبح جسمك مابيستفدش بيه وخصوصا بين الساعة 8 و9، وبرضه بيعلى مستوى هرمون الكورتيزول في الفترة بين الساعة 12 و 1 الضهر، وبين الساعة 5 ونص و6 ونص المغرب وعشان كده الأوقات دي من أسوأ الأوقات اللي ممكن تشرب فيها القهوة.

خلينا بقى نروح للجزء بتاع أحسن الأوقات اللي ممكن تشرب فيها القهوة أو الكافيين عموما وفقا لميلر برضه اللي بيقول إن أحسن وقت تشرب فيه الكافين هو بعد ذروة الكورتيزول وهي الأوقات اللي من الساعة 9 للساعة 11 الصبح، ومن الساعة 1 للساعة 5 المغرب، وبعد الساعة 6 ونص المغرب، لكن عموما حاول تقطع قهوة على الساعة 5 المغرب عشان نومك يبقى أهدأ وماتعانيش من الأرق اللي ممكن يسببهولك الكافيين.



 

Comments: