ماذا قال المشاهير عن شريك الحياة.. "صحبة بتوصل للنجاح"

31/12/2018

بقى بديهي إننا نتكلم عن صعوبات النجاح وإن الوصول ليه تحدي محتاج طاقة وصبر، لكن رغم الصعوبات دي فيه ناس قدرت تحقق نجاحات في حياتها يا ترى إيه السر في ده؟ الناس دايمًا بتميل للجانب الرومانسي في الحواديت، حتى قصة النجاح بيكون فيها بعد رومانسي، ده غير رومانسية النجاح نفسه في حبك الإنجاز، رومانسية النجاح هنا مقصود بيها قصص حب الفنانين اللي ساعدتهم على النجاح.

في استضافات تلفزيونية كشف الفنانين عن شركاء حياتهم ودورهم المؤثر جدًا في النجاح اللي حققوه في حياتهم، وده لأن وجود شخص يدعمك ويديك الحب والإخلاص اللي يهون عليك صعوبات الحياة، بيفرق في المشوار كتير، جمعنا أهم كلام قالوا الفنانين عن زوجاتهم أو أزواجهم، اللي رصدنا فيه بشكل كبير كلام الفنانين عن حياتهم العائلية وشركاء حياتهم.

- "الحب الوحيد اللي أدركت إني في حاجة ليه، وهو نفس حاجتي للحياة، لأنها أثبتت بأدلة كتير أنها سبب عودة مكانتي الاجتماعية والفنية والمادية إليّ مرة تانية، لأن يوم زواجي منها كنت بأشهر إفلاسي، ووقفت زوجتي بجانبي، وكانت تنسيني محنتي، وتشجعني على العمل والكتابة والتمثيل" - يوسف بك وهبي

- "شريكة حياتي كانت زوجتي وعشيقتي وحبيبتي وأمي وأختي وأم ابني، ووقفت معايا في أصعب ظروف في حياتي، وأنا ممتن ليها بكل حاجة، وبعد وفاتها الدنيا ضاقت عليا" - حسن كامي


-  "ماكنتش بخاف من بكرة وزوجي معايا، بعد وفاته بقيت لوحدي في كل حاجة وخايفة من بكرة، وجود الراجل في حياة المرأة شيء مهم جدا، وبيحسسها بأنوثتها" - مديحة حمدي

- "زوجتي ادتني طاقة وثقة في نفسي إني أفضل في التراك للحياة والفن ودعمتني في مشواري الفني" - سيد رجب

- "زوجتي هي شريكة حياتي وحبيبة قلبي، واتحملت مسؤولية كبيرة منها الأولاد والبيت وزوج مشغول طول الوقت، بقالنا 17 سنة نعرف بعض 10 سنين زواج و7 قبلها، زي ما بيقولوا في مصر كده، دي أم العيال" - وائل الجسار

- "سبب جوازي من بسمة إنها عندها حالة صدق وحب ليا غريبة جدًا، كانت معلقة صوري في أوضتها ومن معجبيني، وكانت بتحبني جدًا، وحبت الغنا علشان تغني معايا، أنا عندي أغاني عاملها لبسمة زي اطمني" - تامر حسني

- "زوجي هو حياتي وعائلتي وأهم واحد وقف جنبي يوم مرضي من غير ما أطلب رغم إننا منفصلين، لكنه برضه حب عمري ومشروع حياتي" - سمية الألفي

- "ميمي جمال زوجة طيبة وحنونة، وهي شخصية مسؤولة تحملت مسؤولية كبيرة في حياتي" - حسن مصطفى

- "اتجوزت من 15 سنة بعد دخولي الوسط الفني مباشرة، وأول ما لقيت زوجتي وحبيبتي عرضت عليها الجواز على طول، وحاليًا هي مسيطرة على عقلي وقلبي وده شيء يشرفني" - عمرو مصطفى


- "أنا راجل شرقي جدًا وبغير جدًا وفيه حاجات أقبلها وحاجات تانية لأ، ومقبلش إن مراتي  يكون ليها فانز، ورغم إننا اتعرفنا على بعض في الكورال لكن مقبلتش أغليها تغني أو تكمل في الوسط  الفني" - أحمد فهمي

- "14 سنة جواز بيني وبين جيهان، اتعرفنا على بعض من الشغل وبعد الاستلطاف والمحبة اتجوزنا، أنا حمش وسي السيد في حاجات معينة لكن في الأول والأخر هي زوجتي وبحترمها" - حكيم

Comments: