٨ مميزات للعزوبية هتشجعك تفضل "سينجل"

03/01/2019


مفيش حالة اجتماعية كويسة في المطلق، ولا الارتباط ولا العزوبية في حد ذاتهم بيمنحوا الشخص السعادة والاستقرار، الموضوع ليه علاقة بعوامل كتيرة، منها الوقت اللي بيمر بيه الشخص، أحيانا العزوبية ممكن تحقق الاستقرار والهدوء النفسي للأشخاص في مراحل معينة من عمرهم، في حين إن مراحل تانية عند نفس الأشخاص بيناسبها الارتباط أكتر، وغير الفترات اللي بنعدي بيها، أحيانا العزوبية في مرحلة العشرينات بتكون مناسبة أكتر لحد ما نوصل لمرحلة نضج معينة نقدر من خلالها نعرف اختياراتنا ونحدد رغباتنا، لكن عموما العزوبية أو "السنجلة" ليها مميزات كتيرة على الأقل في المراحل المبكرة من الشباب، زي ما هنشوف:

1- هتعرف نفسك أكتر

لما تقضي فترة من حياتك من غير شريك، مش هيبقى في حد بيؤثر على تفكيرك أو الطريقة اللي بتشوف بيها الحاجات، إنت لوحدك بنظرتك للدنيا والحاجات اللي بتفضلها، واهتماماتك الخاصة اللي مش هتتأثر باهتمامات شريك تاني معاك، الحقيقة إن ده مش صعب تعمله وإنت مرتبط، لكن بيكون أسهل كتي لأن الشخص بشكل لا إرادي بيتأثر بشريك حياته

2- اعرف إنت عايز إيه

العزوبية هتديك مساحة كبيرة من الحرية تجرب وتغلط وتختار تجارب جديدة وتفشل فيها لحد ما تلاقي نفسك، مش هيبقى عليك قيود إنك لازم تنجح دلوقتي، تحقق ذاتك حالا، توصل للشكل المثالي لحياتك مع شريكك في أسرع وقت ممكن، هتبقى بتجرب وبتغلط بأريحية

3- هتدي الأولوية لنفسك

من غير ما حد يتهمك إنك أناني، وإنت "سينجل" هتكون الأولوية ليك، لاحتياجاتك ورغباتك وخططك الشخصية، هتقدر تتعامل مع مشاكل حياتك من غير عبء مشاكل إضافية ومن غير ما تبقى مجبر تدي الأولوية لمشاكل طرف تاني في حياتك

4- اتخاذ القرارات

لما تبقى "ٍسينجل" هتاخدك قراراتك كلها لوحدك، وكل ما تاخد قرارات أكتر لوحدك كل ما خبرتك في اتخاذ القرارات هتزيد، غير لما يساعدك شخص تاني، ده غير إنك لما تاخد قرارك لوحدك فإنت بتدي مساحة كبيرة للعقل في تقييم الموقف، لكن لو مرتبط، قراراتك هتكون مدفوعة بالعاطفة بشكل أكبر، ومش هيكون "قلبك خفيف" وإنت بتاخد القرار، عارف إن قرارك -أغلب الوقت- هيأثر عليك لوحدك مش على شريك حياتك معاك

5- ثقة.. استقلال

وإنت لوحدك هتبقى حاسس بالثقة أكتر، مفيش حد تعتمد عليه بيساعدك تنجح أو تحقق ذاتك أو تحس بالأمان، إنجازاتك وفشلك كلها متعلقة في رقبتك لوحدك، مش هتحس بفضل حد تاني عليك ومش هتشك في قدراتك، لأنك بتعرف تتعامل لوحدك

6- صديق جيد.. حياة اجتماعية أفضل

السنجلة هتخليك قادر تبقى صديق كويس، مش مجبر تقسم وقت بالدقيقة بين صحابك ومتطلبات شريك حياتك، هتبعد عن المقارنات اللي بتحصل طول الوقت بين الصديق والشريك، وتلقائيا كونك صديق جيد هيوفر لك علاقات اجتماعية قوية، تقدر تزور أي حد في أي وقت، تخرج في أي وقت، تعمل اللي إنت عايزه من غير ما تفكر في اعتبارات ليها علاقة بشريك حياتك، والوقت اللي مفروض تكون معاه فيه

7- هتشتغل أحسن

يمكن الارتباط بشخص بتحبه يوفر لك الحب والسلام النفسي، لكن العزوبية هتوفر لك وقت تشتغل وتركز في شغلك أكتر، المشاكل العاطفية والخناقات والخلافات مع شريك الحياة بتاخد كتير جدا من وقت الشخص ومن ذهنه وصحته النفسية، وده بالضرورة بيؤثر على الشغل

8- القوة

لما نجمع النقط للي فاتت كلها هتبقى شخص أقوى، لما تبقى محدد أهدافك، حاطط نفسك أولوية، عارف إنت عايز إيه، عندك خطط واضحة، سايق حياتك، ناجح في شغلك، ناجح مع أصدقائك، محبوب اجتماعيا، كل ده هيخليك شخص أقوى في المطلق

في النهاية كونك عازب أو مرتبط أو متجوز ده اختيار، المهم إنك تبقى عارف إنت عايز إيه إمتى، وتدخل في العلاقة وإنت على الأقل متطمن إنها مش هتأثر عليك بالسلب، و-طبعا- مش هتأثر على شريك حياتك.

Comments: