"طوبة تخلى الصبية جلدة والعجوزة قردة": الشهور القبطية في حياة المصريين (أمثال شعبية وحالة جو ومواسم زراعة)

06/01/2019

أغلب المصريين بيهتموا وبيعتمدوا على التقويم الميلادي وساعات التقويم الهجري عشان يعرفوا منه أوقات الصيام والأعياد والمناسبات المرتبطة بالقمر، بس قليل جدا من المصريين اللي بيهتموا بالتقويم القبطي أو التقويم المصري القديم وغالبا المزارعين هم أكتر الناس بيهتموا بالتقويم القبطي لإنه بيحدد لهم الأوقات اللي يزرعوا أو يحصدوا فيها، وعشان يميزوا الأوقات دي وماينسوهاش ربطوا الشهور دي بمجموعة من الأمثال عشان تفكرهم بحالة الجو وإمكانية الزراعة لإن الشهور دي كانت مرتبطة بوقت الفيضان وانسحاب المياه عشان كده اتقسمت لمواسم البذار والري والحصاد وتشوين القمح.

الشهور القبطية بدايتها مش مرتبطة ببداية الشهور الميلادية، وهما 13 شهر مش 12 زي الشهور الميلادية والهجرية، لإن كل شهر فيهم 30 يوم بس، وفي آخر السنة في شهر اسمه النسيء وهو 5 أيام أو 6 في بعض السنين، خلينا نتعرف عليهم أكتر عليهم بأوقاتهم والأمثال الشعبية اللي اتقالت عليهم:

1- شهر توت (11 سبتمبر لـ10 أكتوبر): أول شهر في السنة القبطية ومعناه الإله "توت" أو "تحوت" وهو إله الحكمة والمعرفة، وهو الشهر اللي بينتهي في وقته الفيضان، فمرتبط عند الفلاح بالري، والمثل المرتبط بيه هو "توت إروي ولا تفوت" ومعنى كده إن الفلاح اللي مابيرويش أرضه في الوقت ده مابيستفدش من زراعتها، وفيه مثل تاني مرتبط بالجو بيقول "توت بيقول للحر موت" لإنه مرتبط بانتهاء الصيف وبدء موسم الخريف.

2- بابة (11 أكتوبر لـ9 نوفمبر):

أو بيطلق عليه اسم تاني وهو "آبة" وهو شهر الإله "آمون"، والمثل المرتبط بالشهر ده بيقول "بابة خش واقفل الدرابة" و الدرابة معناها الشباك اللي بيكون موجود في البيوت الريفية، عشان تبعد عن البرد في الشهور دي، وفيه مثل تاني مرتبط بشهر بابة بيقول "إن صح زرع بابة يغلب النهّابة وان خاب زرع بابة مايجيبش ولا لبابة" واللبابة هي لبابة العيش، ومعناها يعني إن زيادة المحصول في بابة خير حتى لو اتسرق منها.

3- هاتور (10 نوفمبر لـ9 ديسمبر):

ومعناه الإله حتحور إله الجمال والخصب، والمثال المرتبط بيه هو "هاتور أبو الدهب منتور"، الدهب المنتور هنا كناية عن القمح اللي بيتزرع في الوقت ده، وفيه مثل تاني مرتبط بشهر هاتور وهو "إن فاتك هاتور اصبر لما السنة تدور".

4- كيهك (10 ديسمبر لـ8 يناير):

شهر كيهك بيتنطق "كياك"، ومعناها "كاهاكا" يعني تجمع الأرواح، وهو واحد من الأعياد المصرية القديمة، في الفترة دي بيبقى فعلا ليل الشتا طويل، بيكون أقصر وقت للنهار وأطول وقت لليل في السنة عشان كده المثل المرتبط بشهر كياك بيقول "كياك صباحك مساك، شيل يدك من غداك، وحطها في عشاك"، وده دليل إن اليوم بيكون قصير جدا، ومثل تاني للشهر ده بيقول "البهايم اللى ماتشبعش فى كياك ادعى عليها بالهلاك"، لإن في الشهر ده البرسيم بيكون إنتاجه كتير جدا.

5- طوبة(9 يناير لـ7 فبراير):

ومعناه الأسمى أو الأعلى، وهو عيد حصاد أو جمع القمح، وهو شهر عيد الفصح اللي بيكون 11 طوبة، شهر طوبة بيكون فيه التطويب ومعناها إعداد الأرض للزراعة، البرد بيزيد فيه جدا والزرع الشتوي بينمو، وشهر طوبة بيتقسم 3 أقسام وهما "طوبة" هما الـ10 أيام الأولى من الشهر وفيهم البرد بيزيد أوي، الـ10 أيام التانية اسمها "طبطب" وهو البرد اللي بيخلي الشخص يرتعش ويطبطب من كتر البرد، آخر 10 أيام اسمهم "طباطب" وفيهم بيتحول الجو من البرد للمطر، الأمثال المرتبطة بشهر طوبة هما: "طوبة يخلي الشابة كركوبة" و"طوبة تخلى الصبية جلدة والعجوزة قردة"، المصريين بيقولوا على أقسى أيام البرد في طوبة "برد العجوزة".

6- أمشير(8 فبراير لـ10 مارس):

وهو إله العواصف والرياح، وبرضه قسمه المصريين لـ3 أقسام، أول 10 أيام "مشير" الناس بتتخدع فيهم بالدفئ، تاني 10 أيام "مشرشر" الجو بيرجع فيهم للبرد تاني، آخر 10 أيام "شراشر" بيرجع الجو يدفي تاني عشان كده بيتقال عليهم "عشرة العجوز" لإن العجوز تقدر تتحرك فيه عشان بيكون فيه دفى، والمثل المرتبط بشهر أمشير "أمشير أبو الزعابيب الكتير ياخد العجوزة ويطير"، وبيتقال عليه كمان "يفصص الجسم نسير نسير" وده بسبب شدة الهوا وقتها.

7- برمهات (11 مارس لـ8 أبريل):

وده نسبة للفرعون "أمنمحات" وفي الشهر ده المحاصيل بتنمو، والمثل المرتبط بيه هو "برمهات روح الغيط وهات".

8- برمودة (9 إبريل لـ8 مايو):

ومعناه شهر "رنودهه" أو "رئونه" وهو إله الحصاد ويرمز له بالأفعى المقدسة، والمثل المرتبط بالشهر ده هو "برمودة دُق العامودة"، يعني دق سنابل القمح بعد ما نضجت.

9- بشنس (9 مايو لـ7 يونيو):

أصل اسم الشهر "خنسو" وهو إله القمر، وفيه الأرض بتبقى خالية تماماً من المحاصيل لإنه بيبقى بعد حصاد برمودة، والمثل المرتبط بيه هو "بشنس يكنس الغيط كنس".

10- بؤونة (8 يونيو لـ7 يوليو):

وهو وادي الحجارة في طيبة، في الشهر ده القمح بيتدرس ويتخزن، ولون النيل بيتحول فيه للون الأخضر وده بيكون مؤشر على بالفيضان، المثل المرتبط بالشهر ده هو "بؤونة نقل وتخزين المؤونة" لإنهم بيخزنوا الحصاد لباقي السنة، وبيتقال برضه على الشهر ده " تنشف المياه من المعونة "، و" بؤونة الحجر" وده لإن الجو بيكون حر فيه جدا.

11- أبيب (8 يوليو لـ 9 أغسطس):

وهو شهر عيد الإلهة "ابيبي" ومعناه فرح السما، في شهر أبيب بيتزيد مياه الفيضان، فمن الأمثال المرتبطة بيه "أبيب مية النيل فيه تريب" ومعناها إنها بتزيد بسبب الفيضان، وفيه مثل تاني عنه وهو "أبيب فيه العنب يطيب" لإنه موسم طرح وظهور العنب، ومثل كمان  "أبيب أبو اللهاليب" وده بسبب الحر الشديد اللي بيكون فيه.

12- مسرى (10 أغسطس لـ 5 سبتمبر):

واحد من أسماء إله الشمس، في الشهر ده بتزيد حرارة الشمس ومنسوب مياه النيل بيعلى، والمثل المرتبط بيه بيقول "مسرى تجرى فيه كل ترعة عسرة".

13- النسيء (الشهر الصغير):

وهو بيكون 5 أيام في 3 سنين متتالية وفي السنة الرابعة بيكون 6 أيام، وده حصل بأمر من بطليموس الأول سنة 238 عشان السنة تبقى 365 زيها زي التقويم الشمسي، وفي أول أيام النسيء بيتقال إنك ممكن تزرع أي حاجة في معاد غير معادها وهتنمو عادي.

Comments: