لو أنت فريش جرادويت اعرف إزاى تهندل حياتك بعد التخرج

08/01/2019

بعد مش أقل من 15 سنة تعليم في مراحل مختلفة، بتعيش مرحلة جديدة عليك وهي مرحلة ما بعد التخرج  واللي بيكون مطلوب منك تحدد الكارير اللي هتشتغل فيه، ولو عرفت تجاوب على السؤال ده فأنت تخطيت جزء مهم جدًا من هندلة حياتك بعد التخرج لأن كتير بيتخرج من الكلية وهو مش عارف يبدأ منين ولا يعمل إيه خصوصًا لو مش حابب يشتغل في مجال دراسته بالكلية، فهنا هو محتاج يعرف الأول هو عايز يشتغل إيه قبل ما يدور على فرصة.

في الموضوع ده هنساعدك تعرف تهندل حياتك لو هتتخرج السنة دي أو أنت فريش جرادويت.

- أحمد مصيلحي مدير شركة HIRED للتوظيف والتدريب، اتكلم عن موضوع حديثي التخرج، وقال إن الناس في الأول بتكون حاسة بتوهان يعني مش عارفة هي عايزة إيه وحتى اللي بيكون عارف سوق العمل بالنسباله بيكون مبهم ومش عارف يبدأ منين، فالمهم إنك تحدد الكارير اللي عاوزة تبدأ فيه علشان هتكمل فيه لآخر حياتك.

- وكمل "مصيلحي" من ضمن نصايحه اللي منشورة في فيديو ليه على اليوتيوب، ضروري تركز على الكارير اللي أنت عايزه بدل ما تجري ورا أي شغل بيجيب فلوس وخلاص.

- وفي فيديو تاني لرئيس فريق الجودة والدعم بموقع فرصنا، سارة الأودن، وجهت نصايح للناس اللي بتحاول تدور على شغل وهي لسه حديثي تخرج واللي كان منها، أنه ضروري الناس تجرب مجال دراستها في الشغل قبل التخرج علشان تقرر هتكلم في الكارير ده بعد التخرج ولا هتكتشف حبها لمجال تاني

- وكملت أنه ضروري تنزل فترة تدريب في المجال اللي حابب تشتغل فيه قبل التخرج، وتنمي مهاراتك في الكمبيوتر والتواصل وكمان استخدام الانترنت والسيرش.

- أندرو أشرف والمعروف بسفير الشغل، من الناس المشهورة بمساعدته للشباب إنهم يلاقوا فرص عمل، وكمان بيقدم نصايح للناس اللي بتدور على شغل واللي كان أهمها تحسين مستوى الأنجلش بأنك تسمع أنجلش كتير سواء أغاني أو أفلام من غير ترجمة ده هيساعدك تحسن اللغة، وكمان ضروري تحسن مهاراتك في الكمبيوتر والسيرش

- وعلق أندور في فيديو بعنوان إزاى تلاقي شغل في مصر، على الناس اللي بتقول إن الشغل في مصر وسطة إن ده مش حقيقي بنسبة كبيرة لأنها بتكون علاقات بمعنى حد عارف إنت بتشتغل إيه وبتعرف تعمل إيه فبيرشحك لوظيفة، وأكد من النقطة دي إنك ضروري تعرف تسوق لنفسك صح وتعرف الناس اللي حواليك إنت بتعمل إيه بالظبط.

Comments: