اخترنا لك مقتطفات من أجمل قصائد الشاعرة "ريهام شعبان"

09/01/2019

ريهام شعبان أو الشهيرة بجملة "This is for every time you told me speak"!

شاعرة ظهرت على السوشيال ميديا وانتشر ليها فيديو عن قصيدة (لصاحب العيون العسلية)، ومن بعدها اتشهرت على مواقع التواصل الاجتماعي، واستضافها برنامج "كلام ستات" فزاد انتشار القصيدة على السوشيال ميديا، واتقابلت القصيدة بعدم رضا من الجمهور، فجمعنا قصايد لريهام شعبان عشان مانحكمش عليها من قصيدة واحدة:

1- لصاحب العيون العسلية:

This is for every time you told me speak

أيوه أنا بفكر فيك

This is for every time you told me express

مع الأسف أيوه أنا بحس

وحاسه إن إنت ورطة كبيرة وقعت نفسي فيها عن غير عمد

كل ما أقول ابعد، الاقيني باغوط أكتر

وفجأة من غير ما أفكر

الاقيني بقولك هاه، هنروح فين النهاردة؟

طب إيه رأيك في المعارضة؟ طب إيه رأيك في كل حاجة؟

بتحب قهوتك على الريحة ولا سادة؟

طاب ما تيجي نطلب لك واحدة وتيجي نتكلم شوية زيادة

بحب العيون العسلي أأأ في العادة

ماتصدقنيش أنا كدابة، أنا قصدي بحب عيونك إنت

بالتحديد بحب أشوفك باصص بعي.. في الولا حاجة

وببقي متأكده إنك شايف حاجة

كل الناس عدوا ومالاحظوش

وباخدها فرصة إني أبص عليك

قصدي اتنح ليك

Why are you so cute?

You’d make it hard for me

فتلف فتلاقيني ببص على السما

وتسألني فقولك بكلم ربنا.. بأناجية

وأنا في الحقيقة بقوله ليه؟

ليه خليته Irresistible؟

ليه ماكنش زيه زي الكل؟

ممل وبيكره الزحمة

وبيشوف السواقة حاجة رخمة مش رحلة!!

2- الفتاة السيئة:

تجنبني

تجنبني فأنا تلك الفتاة السيئة التي تظهر عكس ما تخفي

تجنبني فأنا تلك الفتاة السيئة التي تحب.. ولا تعلن

تجنبني فأنا تلك الفتاة السيئة المعقدة

أحمل ساعات شتات إنسانية

تجنبني فأنا تلك الفتاة السيئة التي إذا عندت، هبت ريح الخمسين

وإذا سكنت، تحلت بجاذبية التشرين

تجنبني فأنا تلك الفتاة السيئة شبيهة البحر.. استقطبك ثم اغرقك

اريك عذب قاعي فادهشك وامنع عنك الأكسجين

اصطنع القتل الرحيم

تجنبني فأنا تلك الفتاة السيئة مخملية المظهر

احب دفء العائلة

ولكن بداخلي نوات من الصقيع

تجنبني فأنا تلك الفتاة السيئة مطرفة المشاعر

إذا احببت جننت كجنون الإغريق بآلهته

وإذا غضبت ثورت كثورة المظلومين على الطاغوت

اهجر كما هجر قوم سيدنا لوط

تجنب تعدد الشخصيات بداخلي، فقد أصيبك بالخلل

فأنا لست فقط ألوان ساخنة وباردة

أنا كل التدرجات الشاردة

فأثيرك، وأصيبك بالملل

تجنبني فأنا تلك الفتاة السيئة غريبة الطباع

كثيرة الرزانة، كثيرة الضياع

تجنبني فأنا تلك الفتاة السيئة الهاربة.. بل كثيرة الهروب

اهرب دوما مما أحب

3- الحكاية مش أكيد

الحكاية وببساطة

إنها كانت زي العلاقة

كل حاجة تشبه لحاجة مش أكيدة

كلام بليل، واسمع الأغنية دي

حتى المشاوير البعيدة

كل حاجة زي حاجة بعيدة جدا.. لكن قريبة

الحكاية إنك بتغير عليا

بس مش عايزني ابقى ليك

أو عايزني ابقى ليك

بس من غير مسؤولية

الحكاية أنانية

الحكاية إنك بتحب تشكيلي

بترمي كل همومك عندي

بحاول اقلبلك الضلمة وردي

باستوعب اختلافك، وسودوياتك

القط عدوى مرض فكرك

وأظهر كما المعزز حضرتك

تقولي هموت لوحدي

اقولك دي مش آخرتك

واستغرب، امتى هيكون ليا قيمة؟

امتى هتضاف لحسبتك؟

تقطع سكوتنا بنفس طويل

ثم حكاية جديدة، وكلام ماينتهيش

وأفضل حاسة إن ليا فيك لكن ماليش

الحكاية قد تكون أو لا تكون

وادينى مستنية

الحكاية إنك بتشرب حشيش

بس نفسك تكون درويش

تسمع أغاني صوفي وتتكلم عن حب ربنا

وتنفخ دخان الحشيش يدوخنا كلنا

تسند إيدك على ضهر كرسيا

وتبص جامد في عنيا وتقولي.. عارفة؟

إنتي بالنسبالي غير أي بنت

وبعدها بدقيقة تدندن أنا بخاف من الكوميتمنت

4- في ديسمبر

كم تشبه ضباب صباح ديسمبر!

مهيب

بسيط

خطر

ولكن يخفي وراءه كل جميل

محتال أنت كأمطاره

تؤذي ولكنها خير

تخفي العطاء في زي الغضب

معطاء أنت كضياءه

تحنو في الوقت الأمثل

في ديسمبر

أراك أجمل

مذبذب أنت كتقلباته

تبعث جل تناقضات الأحاسيس في ذات الآن

كم أريد أن أراك الآن

متعب أنت كساعة الأستيقاظ في صباحه

ومريح كقيلولة عصره

مبهج كرائحة مخفوق الحليب الساخن في سقيعه

ومحسن كوحدة البحر في آنه

أنيق أنت كألوان غروب ديسمبر

5- لما كنت

فاكر لما كنت صغير

لما كانت كل حاجة أكبر منك

وكنت أنت أوكل اللي من سنك

ليكوا نفس الاهتمامات

فسهل جدا تكون علاقات

وبأقل الحاجات الفرحة تدخل قلبك

مفيش التزامات متقلة وزن حلمك

وكل حلمك شنطة على ضهرك

شيله كتب علوم وحساب

لما ماكنش لتصرفاتك حساب

لما كنت ماسك في ضحكتك

مابتسبهاش

لسه سر جروحك ماتطفاش

لسه قلبك ماطلعش على المعاش

لسه بتقول لما أكبر هبقى حاجة


 

Comments: