علاقة "نجم كل العصور" أبو تريكة بـ"فخر العرب" صلاح: تشجيع وقدوة واحترام متبادل

09/01/2019

نجوم الكرة المصرية اللي المصريين اتعلقوا بيهم وأجمعوا عليهم مش كتير، يمكن في الجيل القديم كانوا كتير بس في الأجيال الأخيرة أغلب المصريين اتجمعوا على حب أبو تريكة ومحمد صلاح، الحلو بقى إن العلاقة بين محمد صلاح وأبو تريكة قوية جدا، دايما فيه تواصل بينهم وتشجيع من أبو تريكة لصلاح، علاقة أبو تريكة بصلاح كلنا خدنا بالنا منها بالذات بعد كلام صلاح عن أبو تريكة في كلمته بعد حصوله على جايزة أحسن لاعب في أفريقيا لـ 2018 لكن التواصل والتشجيع بينهم كان من زمان.

امبارح فاز محمد صلاح بجايزة أفضل لاعب في أفريقيا للمرة التانية على التوالي من "الكاف"، ولما اتسأل محمد صلاح عن لو كان بقى سفير للكرة المصرية، فرد وقتها وقال إن سفير الكرة المصرية قاعد جنب الصحفي وشاور على أبو تريكة، وقال بعد كده إنه نجم كل العصور.

ورد أبو تريكة بعد كده على فوز صلاح بالجايزة بـ"تويت" له على تويتر وقال "مبروك لنجمنا المصرى المتألق دائمًا محمد صلاح على جائزة أفضل لاعب أفريقي للسنة الثانية على التوالي، جائزة استحقها عن جدارة واستحقاق، الوعد بطولة أفريقيا لمنتخب مصر 2019 يا أسطورتنا الخالدة"

العلاقة القوية بينهم بدأت من وقت ما انضم صلاح لمنتخب مصر في الوقت اللي كان بيدرب المنتخب المدرب الأمريكي بوب برادلي، علاقتهم ببعض بدأت لما لعبوا مع بعض في صفوف المنتخب المصري، وقتها خسر المنتخب المصري من غانا 6/1 في تصفيات المونديال، واللي سبب اليأس لمحمد صلاح لكن أبو تريكة كان طلب منه إنه ينسى اللي حصل وإن المستقبل لسه قدامه، وإنه هيقود المنتخب في وقت من الأوقات وفعلا نبؤة أبو تريكة اتحققت.

وفي 2012-2013 اختار صلاح إنه يلبس القميص رقم 22 وهو نفس الرقم اللي كان بيلعب بيه أبو تريكة في الأهلي والمنتخب المصري.

وفي وقت اعتزال أبو تريكة كتب محمد صلاح في ديسمبر 2013 على الفيسبوك وشكر فيها أبو تريكة على كل حاجة وقاله إنه كان محظوظ لإنه لعب معاه، وإنه اتعلم منه كتير، ولحد دلوقتي مش متخيل اللعب من غيره، واتمناله الأفضل في الخطوات الجاية"

اتكلم صلاح في فيديو لايف على الأكونت الرسمي بتاعه عن علاقته بأبو تركة وقال إنه أول واحد يهني أبو تريكة بمناسبة عيد ميلاده، وقال وقتها كمان إنه هيروح إنجلترا الشهر الجاي وهيتقابلوا أكيد وقتها.

وفي شهر ديسمبر 2017، فاز صلاح بجايزة أحسن لاعب في أفريقيا من هيئة الإذاعة البريطانية سي بي سي، وهناه أبو تريكة على صفحته على الفيسبوك وقال "مبروك يا فخرنا والأفضل قادم إن شاء الله" ، وبعدها نشر الإعلامي القطري محمد سعدون الكواري على الفيسبوك فيديو ظهر فيه محمد صلاح ومحمد أبو تريكة معاه وقال الإعلامي محمد سعدون إن مثله الأعلى أبو تريكة.

في الفيديو قال صلاح عن أبو تريكة "لا هو حبيبي وعلاقتنا ببعض مش هقدر اقولها، الناس كلها عارفة يعني وعلاقتي بيه كويسه من زمان" وبعدها قال أبو تريكة عن صلاح "ربنا يحفظه ويكفيه شر الإصابات، وصلاح زي ما بيقولوا له قبول عند الناس، كل ما حد يشوف صلاح يقول ربنا يكرمه، دي أفضل دعوة، اتمناله إن شاء الله إن يستمر، وده قدوة مش للمصريين بس لكل المنطقة العربية، وكل التشجيع والمساندة له"

ده غير طبعا التعليقات والنصايح اللي بيقولها أبو تريكة في تحليلات ماتشات ليفربول لصلاح

Comments: