أبلكيشنز هتسهل عليك يومك من أوله لأخره

09/01/2019

     

                                       

خلاص التكنولوجيا بقت جزء أساسي من حياتنا، ولأن طول الوقت الموبيل بيكون معانا، وعلشان يكون الموبايل مفيد ليك بشكل كبير، دي تجميعة أبلكيشنز هتحتاجها على مدار يومك بالكامل من أول ما تصحى من النوم ولآخر يومك.

علشان Alarm التليفون مفيهاش مميزات كتيرة  تساعدك تصحى في معادك من غير ما تتأخر أو تكسل، جمعنالك أبلكيشن هتعمل الدور دي وفيها مميزات متنوعة:

-   Alarmy sleep if you can
واضح من اسمه كدة إنه منبه مزعج ومش بيرحم ، وبيوفر أكتر من نظام علشان تقدر تطفيه، إما إنك تحطه على وضع الصورة، أو حل مسألة رياضية أو الاهتزاز، في وضع الصورة إنت لازم تصور نفسك سيلفي  في مكان بعيد عن السرير، أما وضع مسألة رياضية علشان تعرف تطفيه بيحتاج منك تحل مسألة رياضية وبالتالي بيضمن إنك تفوق، ووضع الاهتزاز إنك تهز الموبايل بطريقة معينة علشان تقدر تطفي المنبه وبالطرق التلاتة دي إنت بتضمن إنك متتأخرش.

- Mimicker Alarm
واحد من التطبيقات اللي بتوفرها شركة Microsoft  لكل أجهزة الأندرويد، وبيعتمد المنبه على فكرة الألعاب، فبيوفر الخيار لمستخدميه إنهم يختاروا لعبة ما بين 3 ألعاب علشان المبنه يقف عن الرنين، والتلت ألعاب عبارة عن لعبة للألوان التطبيق بيختار لون معين وبيطلب منك تصور اللون  بكاميرا الموبايل، وفي اللعبة التانية التطبيق بيطلب منك تعمل ريأكشن معينة بوشك علشان تقدر تقفله، وفي اللعبة التالتة والأخيرة التطبيق بيعرضلك كلمات متشابهة وبيطلب منك تنطقها، وبالتلت ألعاب اللي فاتت دي بتضمن إنك تصحى من النوم من غير تأخير وكمان فايق.

بعد ما صحيت من النوم  وجهزت نفسك على النزول من البيت، بتحتاج تدور على أبلكيشن تاني تساعدك تروح أي مشوار أنت عاوزه، إذا كنت هتنزل للشغل أو الجامعة أو هتروح أي مشوار تاني بخلاف الاتنين دول، وغير أوبر وكريم هنقولك على أبلكيشنز هتساعدك تروح مشوارك بسهولة:

-Rawa7
التطبيق ده بيسهل على أي حد نازل مشوار ومش عارف الطريق ومحتاج يعرف هيروح إزاي، لأنه بمجرد ما تدخل اسم المكان اللي رايحه، هو هيقولك هيوصفلك الطريق ويسهل عليك بأنه يعرضلك المواصلات اللي تركبها علشان توصل مشوارك.

- ركنة
عادة الناس اللي معاها عربيات عندهم أزمة  في الركنة غير طبعًا تصليح العربية كل أسبوعين، فعلشان نحل المشكلة دي، عملت شركة "ركنة" تطبيق لنفس اسمها بيساعد الناس أنها تركن عربيتها، ودة عن طريق إن العميل يسجل بياناته وتفاصيل عربيته زي لونها ونوعها، بعدها بيتم التنسيق بينه وبين الشركة إنها تبعتله مندوب علشان يركن العربية في واحد من الجراجات اللي بتتعامل معاهم الشركة.

طيب بعد ما توصل الشغل أو الجامعة أو أينًا كان المكان اللي هتروحه فأنت هتحتاج تنظم دنيتك وتكتب الحاجات اللي مفروض تنجزها وعلشان كدة محتاج لنوت بوك، بس دلوقتي تقدر تستبدل النوت بوك بالأبلكيشنز:

- trello
التطبيق ده متوفر منه نسختين واحدة موقع والتانية أبلكيشن للموبايل، من التطبيقات المهمة اللي بتساعد الناس في ترتيب أولوياتها والمهام اللي مفروض تقوم بيها مع تنظيم الوقت، ودة بيكون مفيد جدًا للناس اللي بتعمل كذا حاجة في وقت واحد فبيضمنلهم مينسوش حاجة.

- Rescue Time
التطبيق ده بيساعدك في المحافظة على الوقت بمعنى إنه كل فترة بيديك إحصائية عن الوقت اللي بتضيعه في تصفح التطبيقات المختلفة أو الوقت اللي بتقضيه على السوشيال ميديا، كمان بيساعدك تعمل خطط ليومك وتحط أهداف ليك وتنبيهات.

- Any Do
من مميزات الأبلكيشن تنظيم وقتك على مستويات مختلفة في البيت أو الشغل أو حتى مع صحابك، وكمان بيعملك تنبيهات لكل حاجة رابطها بوقت معين.

- istudiez pro
من التطبيقات المستهدفة طلاب الجامعات، لانه بينظم وقتها في حفظ  وترتيب جدول المحاضرات، وحفظ ايام الاختبارات والواجبات

-camscanner
تصوير المستندات وورق المحاضرات بيكون صعب  خصوصًا وقت الامتحانات، وعلشان تهرب من زحمة المكتبات الأبلكيشن ده بيساعدك تصوير المستندات وتعديلها تنسيقها بشكل يناسب المذاكرة

في يومك أكيد هتحتاج أبلكيشنز للأكل، هتساعدك تعرف الأكل الصحي أو السعرات الحرارية للأكل ومن ضمن الأبلكيشن دي هنقولك على تطبيقات تساعدك تاكل بشكل صحي:

- Fooducate
من التطبيقات اللي بتساعدك تعرف السعرات الحرارية للواجبات  المختلفة، دة بالإضافة إنه بيوضحلك الأكلات المضرة بالصحة علشان تتجنبها وتاكل أكل صحي ومفيد ليك.

- My Fitness Pal
وغير إنك تبعد عن الأطعمة المضرة البرنامج ده بيوفرلك دليل للأكلات الصحية، و فيه تقريبًا مليون ونص وجبة صحية وأغلبهم سهل وبسيط إنك تحضره، هتلاقي في الأبلكيشن ده ارشادات لتمارين رياضية.

ولو عاوز تطور من حياتك ومش عارف تبدأ أزاي أو تنظم حياتك إزاي، هنقولك على ابلكيشنز هتساعدك تعمل ده:

-way of life
لو محتاج تكتسب عادات معينة هتساعدك تطور في حياتك، أو تتخلى عن عادات تانية، الأبلكيشن ده الحل المثالي ليك، لأنه مصمم لمراقبة العادات بطريقة مثالية وبسيطة، وكمان  بيوفر تنبهات علشان يخليك تفتكر.

-balanced
لو أنت من الأشخاص اللي بتحب دايمًا تطوير من نفسها وحياتها فالتطبيق ده هيساعدك بشكل كبير على تطوير نفسك، والأبلكيشن ده بيقترح عليك حوالي 50 عادة وبيكون فيه مرونة إنك تضيف عادات تانية أو ممارسات عاوز تعملها.

وعلشان التجمعية تبقى كاملة لازم تكون فيه تطبيقات بتتكلم عن ممارسة الرياضة واللي منها:

- Map My Fitness
من أهم التطبيقات المتوفرة في جانب الرياضة، واللي بيوفرلك أكر من 400 تمرينة ونشاط رياضي، كمان بيقدر يعمل مزامنة بين أجهزة جسمك  وبين التطبيق ويعرفك  أدائها الرياضي.
كمان البرنامج ده بيقدر يدلك على مسارات السير أو الجري المتاحة بالقرب منك، وكمان بيقولك على عدد السعرات الحرارية اللي حرقتها.

- Workout Trainer
المميز  في الأبلكيشن  ده إنه بينزل فيديوهات شرح خطوة بخطوة إزاي تعمل التمارين كمان بيوفرلك عدد من التمارين المختلفة لعضلات البطن.

أبلكيشن للبنات هتحتاجها أكيد علشان تنظم مواعيد البريود بتاعتها كل شهر:

- WomanLog Calendar
بالنسبة للبنات بتبقى محتاجة تسجل أيام البريود علشان متنسهاش أو لأسباب تانية كتير، من ضمن التطبيقات دي هتلاقي الابلكيشن ده اللي بيسجل أول يوم من الدورة الشهرية وكام يوم استمرت.

- Period Tracker
أما التطبيق ده مميزاته بتكون مختلفة شوية في إنه يقولك على معاد الدورة الشهرية المقبلة، وللستات المتجوزة الأبلكيشن ده بيكون مفيد ليهم في إنه بيوفر تنبيهات بمواعيد وسائل الحمل.
ده غير الميزة الأساسية في تسجيل معاد الدورة الشهرية والمدة اللي بتاخدها كل شهر.

كمان فيه أبلكيشن عن العلاقة الجنسية وأغلبها بيكون مستهدف الناس المتزوجة:

- truth or dare
في العلاقات الزوجية الناس بتشتكي من الجمود أو الملل، في الأبلكيشن ده بيدي نصايح إزاي تكسر الجمود في العلاقة وبيساعدك على وجود علاقة حميمة فيها حب وحيوية.

- Kindu
الأبلكيشن ده من التطبيقات اللي تقدر تشاركها مع الطرف التاني، وده لأنه بيسألك أسئلة معينة بتجاوب عليها بنعم أو لأ وتشاركها مع الطرف التاني علشان يكون عنده معرفة باحتيجاتك في العلاقة.

Comments: