لو مسافر أي بلد مش هتحتاج تتعلم لغتها.. البس التيشرت ده بس

10/01/2019

دلوقتي علشان تسافر أي بلد مش هتحتاج تتعلم اللغة بتاعتها علشان تبقى بتعرف تتعامل مع الناس في المدينة اللي أنت مسافر ليها، لأن ببساطة فيه شركة حلت الموضوع ده بتيشرت مطبوع عليه أيقونات تقدر تتواصل بيها مع الناس حتى لو مش عارف تتكلم نفس لغتهم.

طبعًا الفكرة ممكن يستغربها كتير من الناس وبيبقى عندهم الفضول يعرفوا الفكرة جات للشركة دي إزاي، فالأول خلينا نعرفك مين صاحب فكرة التيشرت ده، والفكرة مش لشخص واحد لكن شارك فيها اتنين أصدقاء كان عندهم الدافع في كسر حواجز اللغة بين البلاد فاستخدموا طريقة بدائية وتعتبر من أوائل طرق التواصل بين البشر وهي لغة الإشارة، استخدم تقريبًا 39 رمز بعد اختيارهم للرموز دي بدقة خصوصًا إن الرموز دي لازم يكون متعارف عليها في أكتر من دولة، وطبعًا كانت من ضمن الأيقونات دي، إشارات بتعبر عن احتياجات يومية زي الأكل والشرب وغيره.

الأصدقاء تعاونوا وأسسوا شركة تحت مسمى "ICONSPEAK" واللي نشاطها مكنش متوقف على إنتاج التيشرتات وبس لكن كمان قدرت الشركة إنها تستخدم منتجات تانية علشان تطبع عليها الأيقونات زي جراب الموبايل والشنط بتصميمات مختلفة، والأسعار كانت متنوعة يعني التيشرت بـ 33.0 $ تقريبًا أما جراب الموبيل وصل سعره 22.0 $.


 


 

Comments: