١٣ مشكلة مش هيفهمها غير اللي عندهم فخاد

14/01/2019

كتب: أية زكي

المحشي والمكرونة البشاميل والعشا المتأخر مش أكتر حاجة صحية بالنسبة لشكل الجسم، عشان كده أغلب المصريين أو المصريات بالأخص بيعانوا من الفخاد، مش احنا بس، العالم كله مليان فخاد، مش الأكل المصري هو السبب بس ما ال"Fast Food" مبوظ الدنيا عند الفرنجة، حاسين بيكوا وبنعاني معاكوا في نفس مشاكل الفخاد.

عشان كده جماعنا 13 مشكلة بيعانوا منها أصحاب الفخاد:

1- إنك تلاقي بنطلون جينز على قد فخادك ووسطك في نفس الوقت من غير ما تضيق حاجة فيهم دي مهمة صعبة جدا.

2- في الإعلانات وعلى الموديلز الفساتين بتكون فساتين، عليكي إنتي لما تقسيهم بيكونوا تي شيرتات، فرجاء خاص للسادة والسيدات المصممين: ممكن لو سمحتوا تصمموهم أطول أو أوسع شوية عشان يجوا على قدنا أو لحد ركبنا حتى.

3- خسرنا بنطلونات جينز كتير بسبب فخادنا، لإن مع الوقت هتلاقي البنطلونات الجينز "بتدوب" وتتقطع بسبب احتكاك فخادك.

4- الشورتات العادية على كل الناس بتبقى هوت شورتس عليكي، وكل ما تمشي خطوتين هتلاقي الشورت بيترفع.

5- قبل ما بنخرج بجيب أو فستان لازم نعرف درجة الحرارة إيه، لإن الحر بيسبب مضاعفات إنتي في غنى عنها.

6- البنطلون الجينز دايما بيقع مننا، مش مهم بقى هو من ماركة إيه ولا نوعه إيه ولا إنتي حاطه حزام أو لا، هو لازم يكون "high waist" عشان مايقعش.

7- من أصدقاءنا اللي ماينفعش تستغني عنهم في حياتنا هي بودرة التلك أو الـ"بيبي بودر".

8- لو لبسنا بنطلونات بوي فريند بنلاقي القطعات العادية اللي في البنطلون دي بتبقى عاملة تاتو في فخادنا.

9- الفساتين القطيفة مابتلقيش فينا، إلا لو إنتي حابه تظهري بشكل كرفي.

10- ماعندناش فكرة معينة عن شكل جسمنا بالظبط، يعني هل هو مع بتوع شكل جسم التفاحة ولا بتوع الكمترى ومع بتوع الساعة الرملية، إحنا مالناش مالكة.

11- لما بنعمل دايت بنعمل طفرة في البشرية جسمنا  كله بيخس إلا فخادنا الجميلة، ولو خست هتبقى آخر منطقة في جسمك بتخس كأنها بتعاقبنا عشان بنحاول نستغنى عنها.

12- في الشتا إحنا في نعمة، مش محتاجين جوانتي، أول ما إيدينا تسقع ممكن نمسي على فخادنا، فهنتدفى وتحدي.

13- وإنتي أكيد عارفة المشي لساعات طويلة في الحر ممكن يعمل إيه.

Comments: