حياة داليدا الفنية بين مسابقات الجمال والغناء والتمثيل

17/01/2019

داليدا أو يولاندا كرستينا الفنانة العالمية اللي اتولدت في حي شبرا سنة 1933، اتولدت وعاشت أول فترة من عمرها في مصر لكن أبوها وأمها من أصل إيطالي، حبت التمثيل من صغرها وكان نفسها تبقى فنانة مشهورة وعشان كده اتعلمت من صغرها العزف والغنى.

لكن بسبب الظروف الصعبة اللي عاشتها عيلتها لفترة خدت داليدا دروس على الآلة الكاتبة، وبعدها بدأت تشتغل سكرتيرة في مصنع أدوية، لكن حلم الشهرة فضل في دماغها لحد ما شاركت في مسابقة جمال على المستوى المحلى سنة 1951 وفازت بلقبها، وبعدها قدمت في مسابقة ملكة جمال مصر سنة 1954 وفازت بلقبها وفازت بلقبها برضه.

بعد فوزها في المسابقة شافها المخرج نيازي مصطفى فداها دور في فيلم سيجارة وكاس في نفس السنة  مع سامية جمال وكوكا، لكن داليدا حسيت إنها ماوصلتش لحلمها وكانت عايزة تدور على شهرة أكتر فسافرت فرنسا في ديسمبر 1954.

وفي فرنسا دورت كتير على فرص تمثيل في مكاتب التمثيل والملاهي الليلة لحد ما خلصت الفلوس اللي معاها فقررت ترجع مصر لكن الصدفة لعبت دور إن شافها مدرب الصوت رولاند برجر وأقنعها وقتها إنها تتخلى عن فكرة التمثيل وتبدأ تغني وده اللي حصل فعلا.

وبدأت فعلا تغني على مسارح باريس لحد ما الصدفة لعبت في حياتها دور تاني وحضر عرض ليها مدير مسرح "الأولمبيا" وهو مسرح من أكبر مسارح فرنسا، وكان وقتها بيدور على أصوات جديدة ومميزة ولقي اللي هو عايزة في داليدا.

غنت داليدا أكتر من 500 أغنية بـ 9 لغات وهما العربي والفرنساوي والإيطالي والعبري والياباني والأسباني والتركي و الهولندي والألماني، ووصلت للعالمية فأغانيها اتصدرت قوائم أفضل 10 أغاني في العالم لسنين، وكمان داليدا هي أول الفنانين اللي استعملوا فكرة تصوير الأغاني لفيديو كليب.

من أهم أغاني داليدا اللي غنتها بالعربي:

1- حلوة يا بلدي

2- أحسن ناس

3- سالمة يا سلامة

4- أغاني أغاني

5- يلا بينا يلا

6- جميل الصورة

وصلت بعد كده داليدا لحلمها اللي هو التمثيل ومثلت 12 فيلم، وبالتحديد سنة 1986 طلب منها المخرج العالمي يوسف شاهين إنها تشارك معاه في فيلم "اليوم السادس" وهو بطولة شويكار وصلاح السعدني و محسن محي الدين والفيلم فعلا نجح جدا، وده كانت الفيلم المصري التاني اللي شاركت فيه داليدا بدور بعد فيلم سيجارة وكاس.

Comments: