طبيب نفسي ومعالج وأخصائي و"لايف كوتش".. اعرف الفرق بينهم

23/01/2019

كتب: آية زكي

الشخص اللي بيعاني من أي مشاكل نفسية بيبدأ يسأل اللي حواليه يعمل إيه عشان يتخلص منها أو عشان حد يساعده، غالبا الحل الأساسي اللي عند كل الناس هو إنه يروح لدكتور نفسي، وبعض الناس ممكن تكون عندها بعض المشاكل اللي بتحتاج فيها مساعدة شخص تاني لكن مش بتعاني من أي أمراض نفسية، في حين إن الدكتور النفسي أو المعالج النفسي الاتنين مدربين على مساعدة الأشخاص اللي بتعاني من أي مشاكل، طيب إيه الفرق بقى بينهم وبين بعض وبينهم وبين اللايف كوتش كمان؟

- الدكتور النفسي

هو دكتور/ طبيب درس فعلا في كلية الطب والجراحة العامة 7 سنين، وبعدها قضى 4 أو 5 سنين في الطب النفسي، اختصاصات الدكتور النفسي هي علاج الأمراض النفسية والعاطفية والسلوكية كمان، الطبيب بيكون خد تدريب في الطب النفسي والصحة النفسية واضطرابات الإدمان، وبيكون قادر إنه يكتب للشخص دوا أو علاج يساعده على تخطي المشكلة اللي بيمر بيها، الدكتور النفسي قادر يفهم العلاقات المعقدة والمتشابكة بين الأمراض النفسية والجسدية والمشاكل العاطفية، ويفهم أكتر عن التاريخ المرضي للعيلة ودور الجينات في أي أمراض جسدية أو نفسية، وده عن طريق تقييم البيانات النفسية والجسدية للمريض وتشخيص الحالة بشكل متكامل، ومن خلاله يبدأ يتعامل مع المريض بخطة علاجية واضحة ومتكاملة.

- المعالج النفسي

هو الشخص الحاصل شهادة ماجستير أو دكتوراه في علم النفس، وغالبا بتكون في علم النفس الإكلينكي، المعالج النفسي بيكون خد تدريب مكثف على أبحاث بتمكنه من تقييم الحالة النفسية للمريض وتدريب تاني مدته سنة أو سنتين عن طرق العلاج والاختبارات التحليلية وطرق حل المشاكل والعلاج السلوكي وممكن يتعامل مع الأمراض اللي مش محتاجة إن الشخص ياخد أدوية، زي القلق والوسواس والفوبيا، المعالج النفسي بيقدر يساعد الناس في حل مشاكلهم عن طريق العلاج النفسي وشوية تدخلات سلوكية.

الفرق الأساسي بين الطبيب النفسي والمعالج النفسي، هو إن الطبيب ممكن يوصف للمريض علاج دوائي، لكن المعالج النفسي مابيعملش ده، لأن تدريب الدكتور النفسي بيكون معتمد على علوم الأحياء وكيمياء الدماغ والأعصاب، لكن تدريب المعالج بيكون معتمد بشكل أكبر على السلوكيات، لكن في النهاية الدكتور النفسي والمعالج النفسي هما الاتنين بيعالجوا الأشخاص اللي بتعاني من الأمراض النفسية الشديدة.

- الأخصائي الاجتماعي

فيه مهن تانية مساندة للدكتور النفسي والمعالج النفسي زي الأخصائي الاجتماعي، اللي بيقدموا مساعدة لأفراد العائلة عشان يقدروا يتعاملوا مع مشاكلهم النفسية، ومن ضمن مهام الأخصائي الاجتماعي إنه يقدم نصايح ومشورات للعيلة والمتجوزين، أو بيساعد الأشخاص في تقبل المشاكل النفسية أو الاجتماعية اللي عنده زي حالات الإعاقة الجسدية مثلا.

- اللايف كوتش

مؤخرا، ظهرت مهنة مساندة تانية وهي "اللايف كوتش"، وهو عبارة عن الشخص اللي ممكن يساعدك في تحديد أهدافك وإنك تحطلها خطط واضحة ومسار ليها، والهدف من ده إنه يعمل تغيير جوهري في حياة الشخص، وده بيتم عن طريق جلسات مع الشخص من خلال أسئلة موضوعية بيطرحها "اللايف كوتش" عشان تكشف عن جوانب تانية وجديدة ممكن الشخص نفسة مايكونش عارف عن وجودها حاجة، ومن خلالها بياخد قرارات ناجحة ويفتح للشخص فرص واختيارات جديدة، أما الفرق بين "اللايف كوتشينج" والجلسات النفسية إن الاستشاري النفسي بيدور على تشخيص مرض معين عن طريق إنه بيدخل في ذكريات المريض وطفولته وخبراته الحياتية ومنها بيبدأ يقرر العلاج، لكن "اللايف كوتش" مش بيشخص حالة الشخص أو يوجهه لقرارات، هو مجرد بيقدم مساعدة بإنه يسلط الضوء على الجوانب غير المرئية عند الشخص اللي بيساعده.



 

Comments: