١٠ أنواع للناس اللي بتكره المطر: إحنا كتير

06/02/2019

الشتا في مصر بقى عبارة عن ساقعة بتدخل في العضم بس، المطرة والزحاليق بيجوا كام مرة يتعدوا على الصوابع طول الشتا، بس للأسف لما الجو بيقرر يكشرعن أنيابه ويمطر مابيرحمناش، بتبقى مطرة وطينة وأيام صعبة.

وزي ما في ناس بتحب المطر وبتتغزل فيه مع كل مرة الدنيا تمطر، في ناس مابتحبش المطر ولا الأجواء الشتوية دي، وصوتهم ما بيطلعش خوفا من هجوم محبي المطر وهم:

1- الناس اللي بتلبس نضارات طبعا:

اليوم بيبقى ضباب بالنسبالهم لا قادرين يشوفوا بالنضارة من المطرة، ولا قادرين يقلعوا النضارة عشان مش هيشوفوا من غيرها، فالرؤية بالنسبة لهم في الأيام دي في الأماكن المغلقة أو تحت الشمسيات فقط.

2- الناس اللي بتركب مواصلات:

عموما الخروج في أيام المطرة مهمة صعبة، بس للناس اللي بتركب مواصلات أصعب لإن المواصلات بتبقى زحمة وقليلة، ولو قررت تركب أوبر أو كريم هتلاقي السيرج مضروب في 3 وهتدفع اللي قدامك واللي وراك عشان تروح البيت في سلام.

3- أي حد بيحتك بالشارع أصلا:

المحور واقف والدائري مابيتحركش وكوبري أكتوبر منذ بداية الخلق أصلا وهو زحمة يعني، وده طبعا عشان محدش بيبقى شايف قدامه واللي بيمشي على 60 بيبقى مقطع بطاقته ومتهور، ده غير الحوادث الغير مبررة اللي بتحصل أيامها.

4- الناس اللي بتكتب على الفيسبوك "Oh, it's raining" :

وطبعا ماننساش القلب الأزرق جنب الجملة، في المطلق يعني تلزيق ومحن Status الفيسبوك وقتها من أهم أسباب كره كل الناس للمطرة.

5- الأمهات اللي بتنشر غسيل:

خصوصا لو نزلت وسابت الغسيل منشور، أو كانت ناشرة غسيل بليل وصحيت لقيت المطرة مطرت عليه خلاص "وجع قلب"، بس عموما فقرة المفاجأة والخضة بتاعت "المطرة بتمطر! يالهوي الغسيل"، بتعتبر مشهد كوميديا سودا البيت كله فيه بيبقى في حالة طوارىء.

6- اللي بيروحوا يلاقوا عدس:

بغض النظر بتحب العدس أو بتكره، بس أيام المطرة بتبقى فترة ورا بعضها كده، فمش معقول كل كام يوم هتلاقي ماما عامله عدس وهتحب تاكله عادي وإنت مبسوط إلا لو كنت لئيم وبتعمل حسابك وبتاكل بره يومها.

7- المهووسين بالنضافة:

بيزعلوا أوي بجد، الجزم والكوتشيهات البيضا بتدمر، بالذات لو اتمشيت شوية في المطرة أو واحد غشيم سايق عربية طرطش عليك، كده مبروك عليك يا برنس هدومك كلها بقيت بالطينة وشرابك اتبل وريحتك بقيت زي الكلب المبلول.

8- الكسلانين:

اللي بيكسلوا يغسلوا عربيتاهم، اللي بيكسلو يمسحوا البيت، اللي بيكسلوا يغسلوا الهدوم ويمسحوا الجزم، بيزعلوا أوي برضه عشان كل حاجة في حياتهم المطرة والطينة بتعلم عليها، وبيضطروا يقاوموا كسلهم ويغسلوا ويمسحوا وينضفوا.

9- البنات اللي بتعمل شعرها:

بصي إحنا حاسين بيكي، هي المطرة مابتمطرش إلا تاني يوم ما تعملي شعرك.. قلبنا عندك

10- اللي بتعاني من Ombrophobia:

الـ Ombrophobia هي الخوف من المطرة، الفوبيا دي موجوده عند نسبة قليلة من الناس بس موجودة بالفعل، عند الكبار أو الأطفال، واللي بتبقى عنده بيكون المطر بالنسبة له عذاب حقيقي.

Comments: