أكلات مصرية خضرا اتمردت على الصلصة

07/02/2019

المطبخ المصري مشهور باستخدامه المفرط للصلصة، إحنا بنحب الصلصة على كل أنواع الأكل تقريبا من أول الكشري لحد صينية البطاطس باللحمة، اللون الأحمر غالب على كل أكلنا تقريبا، بس في كام أكلة غردت خارج السرب وفلتت من أحمر الصلصة، منهم اللي بنحبهم ومنهم اللي بنكره حياتنا لما بنلاقيهم مطبوخين على الغدا ودول أشهرهم.


عائلة الملوخية
الملوخية دي عائلة كبيرة فيها كذا حاجة ومختلفين عن بعض فيه ملوخية بالأرانب و ملوخية بالفراخ وكمان اللحم، وملوخية ناشفة، والملوخية من الأكلات والأطباق المشهورة في المغرب وتونس والجزائر وبلاد الشام والسودان.

السبانخ
برضة من الأكلات اللي موجودة في نفس قائمة الأكلات الخضراء هي السبانخ، وهي في الأصل أكلة إيرانية، السبانخ زي ما إحنا عارفين بتتعمل باللحمة الرز وكزبرة وتوم وكركم، ساعات بيتسلسل للسبانخ بعض الصلصة ولكن إحنا هنتغاضى عنها ولا كأننا شوفناها.

 

البصارة
من الأكلات المصرية القديمة قوي هي البصارة دي، وكمان هي تعتبر من أرخص الأكلات اللي مش هتحتاج تدفع كتير علشان تعملها، الأكلة دي عبارة عن فول مدشوش ومعاه شوية خضروات وتوابل.

قلقاس
مش ناس كتيرة بتحب تاكل القلقاس ولا بتفرح لما تعرف إن مامتهم عاملة الطبخة دي على الغداء، بس هي من الأكلات المهمة والمفيدة جدًا لأن فيه فيتامينات ومعادن كتيرة زي الحديد والكالسيوم، ده بإضافة إنه بيقوي مناعة الجسم من البكتريا.

خبيزة
الخبيزة من الأكلات الشعبية جدًا المنتشرة في الدول العربية كلها، وهي ليها فوايد كتيرة منها مثلًا علاج للالتهابات ومسكنة للآلام، وكمان بتقوي المناعة بشكل كبير.

بامية ويكة
مش كل الناس عارفة البامية الويكة دي، أغلب الناس تقريبًا متعرفش غير البامية اللي بتتعمل بالصلصة أما الويكة دي زي ما بيقولوا عليها أكلة الصعايدة، وهي بامية بس مهروسة مع الثوم المفروم والكزبرة.

شوربة الكوسا
كلنا عارفين الكوسة اللي بصلصة بس شوربة الكوسة دي بقى مختلفة شوية، هي في الأساس الناس بتشرب الشوربة دي علشان الدايت وفايدتها الحقيقية إنها بتخلي الناس تحس بالشبع وتقلل من إحساسهم بالجوع.

 

السلق
من الأكلات اللي شبه السبانخ، وعادة السلق ده بيكون مكون من مكونات أكلة ثانية زي القلقاس مثلُا وغيرها من الأكلات اللي السلق بيكون واحد من مكوناتها وكمان السلق ينفع يتعمل أكلة لوحدها.
من فوايد السلق أنه بيعتبر كعلاج لمرض السكر والسرطان والعضام والعناية بالشعر، وكمان تقوية النظر.

Comments: