الخوف من الارتباط أسبابه وإزاي تتخلص منه؟

10/02/2019

لو عندك خوف تجاة الدخول في علاقة مع حد الموضوع ده هيساعدك بشكل كبير، لأنه هيقولك إزاي تتعامل مع المشكلة دي بعد ما تتعرف على الأسباب اللي تخلي عندك خوف تجاه الارتباط.
علشان يكون الكلام علمي ومن مختص تواصلنا مع الأخصائية النفسية "بسنت محمد" وكان من أهم النقط اللي قالتها كالآتي..

أسباب الخوف من الارتباط:


- عادة الخوف من الارتباط بيكون بسبب خبرات قديمة متحررتش منها، كمان الخبرات السابقة دي بتسيب تصورات سلبية عن نفسك ومعتقدات غلط مأخوذة من نظرة الناس وآرائهم فيك.

- أو بيكون الخوف ناتج من تقمص لقصص غير ناجحة سمعتها أو شوفتها في المحيط اللي حواليك سواء كانوا من أهلك أو قرابيك ومن صحابك.

- كمان الجهل بطبيعة الرجل والأنثي واختلافاتهم وبالتالي ده بينتج عنه عدم فهم الطرف الآخر واتخاذ قرار إما بالإبتعاد عنه أو معاداته.

- غير إن التصورات الغلط عن طبيعة الزواج سواء توقعات إيجابية غير حقيقية أو تصورات سلبية مبالغ فيها تعتبر سبب قوي للخوف من الارتباط.

- كمان التأثر بالميديا والمسلسلات والأفلام اللي بتعرض علاقات غير واقعية بيكون ليها تأثير كبير جدًا على الناس اللي بتشوفها.

- أما عن عدم فهم الشخص لنفسه ودخوله في صراعات مع نفسه وبالتالي مبتكونش عنده قدرة علي إقامة علاقات ناجحة مع طرف آخر أو شريك للحياة.

من هنا بيجلنا سؤال واحد طيب إيه الحل؟

- أولًا طلما عرفت إن النماذج اللي متقدمة في الميديا بتأثر على الأشخاص يبقى لازم تدرك إنها غير واقعية.

- حاول لما تسمع قصص ناس وخبراتهم في تجربة الزواج متتأثرش ولا تتفاعل معاها

- بيكون ضروري قوي لو عندك تجربة سابقة وفشلت إنك تواجهها، بمعنى إنك تواجه أوجاعك اللي لسه باقية فيك من العلاقات السابقة ودة بيكون من خلال تحرير المشاعر والأفكار اللي جواك من التجربة دي بمساعدة مختص نفسي.

- الوصول للسلام النفسي هيساعدك على الدخول في علاقة مع طرف تاني وتقدر كمان تستوعبه، فخليك شغال على ده دايمًا.

- ثقف نفسك بالقراءة مثلًا طبيعية الاختلاف الفطرية بين الذكر والأنثى وطبيعية كل حد فيهم.

- ضروري إنك تواجه المخاوف الخاصة بخوض تجربة الزواج ومناقشتها مع مختص أو شخص أهل للثقة ولديه من الحكمة والحياد، ودة هيساعدك جدًا في مراجعة أفكارك وإعادة تقييم الأمور.

- كمان من المهم إنك تخوض التجربة حتى لو مكملتش علشان تتعلم منها وترتقي في مستوى وعيك للحياة والطرف التاني.

- خلي عندك إحساس بالوفرة في العلاقات، وده هيساعدك في إنك متتعلقش بشخص مؤذي بدافع الاحتياج العاطفي.

 

Comments: