عبثيات: 5 خطوات للتخلص من التردد أو لعدم التخلص!

11/02/2019

التردد في الاختيار أو القرارات ممكن تبقى صفة أو طبع فيك أو ممكن تبقى نتيجة عدم الثقة في النفس أو إن الشخص مش مسؤول، إحنا نفسنا احتارنا يعني ومش عارفين نقرر أو ماحنترناش، بس عشان تتخلص من التردد حاول أو ماتحاولش تطبق كل النصايح دي أو بعضها:

1- اتخلص من الخوف اللي مخليك تبقى متردد أو حافظ عليه وشوف باقي النصايح يمكن حاجة تانية تنفعك.

2- حدد أهدافك لإن ده من أهم العوامل اللي هتساعدك بس ممكن ماتساعدكش، وممكن تمشي بعشوائية فترتاح أكتر من التردد بأولوية الأهداف أو مش هترتاح.

3- اتحمل مسؤولية قراراتك، أو قول لست الحبايب تتحمل هي المسؤوليات دي هي بتحب المسؤوليات.

4- فكر بطريقة إيجابية، بس هتسيب السلبية لمين؟! ساعات ما ينفعش نبقى متفائلين بزيادة بدون دراسة كويسة للخطوة اللي هناخدها أو نتفائل عادي مش حرام يعني.

5- نتمنى تكون النصايح اللي فاتت دي ساعدتك أو مساعدتكش بس انبسطت بيها أو مانبسطش مش هتفرق كتير.


 

Comments: