دليلك لأشهر أكلات الصعايدة.. إحنا الصعايدة وصيتنا سابق قبلنا

11/02/2019

كلنا عارفين إن كل بلد بتكون مشهورة بأكلة معينة محدش بيعرف يعملها غير ولاد البلد دي و مبتبقاش مشهورة غير بينهم، و علشان كدة عملنا ليك دليل في أكلات الصعايدة علشان لو ملكش فيها ومتعرفهاش تاخد فكرة عنها وتتعلم إزاي تعملها.

- الثخينة
ودي من الأكلات اللي لا يعرفها ولا يعملها غير الصعايدة، ودايمًا بيعملوها في العيد الكبير لأنهم يعتبرونها نوع من أنواع الفتة، الرقاق المكسر عليه ثخينة اللي هي عبارة عن بصل معمولة بالشوربة.

- البامية الويكة
أغلب الناس اللي عايشة في القاهرة وبحري لما تقولهم البامية الويكة يقولولك إيه؟
مش البامية اللي بصلصة لأ دي بامية فرك، بعد سلق البامية بتتفرك بالمفراك فتطلع في الآخر بامية ويكة.

- المخروطة
وهي أكلة عبارة عن دقيق وماء وملح بسيط من غير مقادير معينة لغاية ما تتكون عجينة، وبعد ما بتتكون العجينة وتفردها بالنشابة بتبدأ تقطعها بالسكينة لشرايح طويلة رفيعة شبه الاسباجتى، وبعدين تجيب حلة مليانة مايه وفوقيها مصفاة وعليها شاش وفوقها العجينة وتفضل كدة لغاية ما تستوي على البخار،وبعدين تطلعها في طبق وتحط عليها سكر بودرة وبالهنا والشفا.

- الفايش الصعيدي
بنلاقي الفايش في أي مكان بس الفايش الصعيدي ده مختلف شوية في الطعم، عادة الصعايدة بياكلوا الفايش مع كوباية شاي بلبن، وفي ناس بتستنى الفايش اللي بيجي من البلد.

- العيش الشمسي
العيش الصعيدي أو زي ما هو معروف العيش الشمسي أو الملتوت، النوع ده من العيش بيمر بست مراحل، ومن أهم الخطوات الستة دي هو أنهم بيحطوه في الشمس.

- الدقاشة
وهو البلح اللي قبل ما ينضج وبيكون لونه أخضر، وبيفرح بيه أطفال الصعيد لما بيروحوا يجمعوه من تحت النخل، وأحيانًا بيضاف ليه لبن.

- الجلاب
الأكلة دي معروفة بقُمع العسل، ودي واحد من الأكلات الحلوة اللي مشهورة في قنا جدًا، الأكلة دي فكرتها قايمة على وضع العسل الأسود في فرن نحاسي لمدة 15 دقيقة وبيكون محطوط في إناء "مخروطي".

- الشعرية باللبن
ودي بسيطة قوي وعبارة عن عشرية بيضاف عليها لبن بس في الأول طبعًا الشعرية بتتحمر.

 

- الملوخية الناشفة
الأكلة دي عبارة عن ملوخية ناشفة عليها ثوم عادي وشربة بس الفكرة نفسها في الملوخية، ازاى تنشفها سهلة برضو بتجيب الملوخية كدة وتنشفها خالص وتسيبها لغاية ما تنشف وبعد كدة تروح فاركها فتطلع معاك ملوخية ناشفة حلوة وجميلة.

Comments: