٧ كتب خفيفة هتهون عليك ملل المواصلات

12/02/2019

قايمة بكتب لايت وخفيفة هتنفعك تحارب بيها ملل المواصلات وتلهيك شوية عن الأوفرثينكينج اللي بيهجم عليك في الوقت ده..

- كتاب إذاعة الأغاني لـ "عمر طاهر"
من التعليقات اللي اتقالت عن الكتاب ده من ناس قرأته إنه من أخف وأجمل كتب عمر طاهر واللي باين فيها حسه الساخر ومشاعر إنسانية عن مواقف كتيرة بنمر بها في يومنا.

- تاكسي لـ "خالد الخميسي"
كتاب بيتكلم عن حكاوي المشاوير، ودي يمكن أغلبنا عاشها مع سواق تاكسي أو كمسري الميني باص وغيرهم من الناس اللي بنقابلهم في المواصلات وبيحصل بينا كلام وحكاوي، ده بالظبط اللي رصده الكتاب من منظور مختلف للواقع المصري.

- جمهورية العبث  لـ "بلال فضل"
لو بتحب تقرأ في السياسة الساخرة يبقى الكتاب ده مناسب ليك  جدًا، أولًا هتتسلى بكمية السخرية اللي فيه وكمان هيتكلم في واقع عن السياسة في مصر.

- سندريلا سيكريت لـ "هبة السواح"
شعار الكتاب ده مش للبنات بس، هو كتاب خفيف وهو بيتكلم في العلاقات بصفة عامة، علاقتك بنفسك وعلاقتك بالناس اللي حواليك ميزة الكتاب ده أنه خفيف هتعرف تقراه في المواصلات.

- اعترافات جامدة لـ "شريف أسعد"
كتاب كوميدي من العيار التقيل، بيقولك على مواقف حصلت معانا كلنا وإحنا صغيرين في دايرة العيلة والصحاب والقرايب، يعني ممكن نقول عليه كوميديا النوستالجيا.

- عنبر الحواديت لـ "رحاب هاني"
الكاتبة الساخرة رحاب هاني ليها أكتر من كتاب منهم "بوسطة" وده يعتبر أحدثهم و"عنبر الحواديت" و"كلام فاضي".
عنبر الحواديت مكتوب بلغة عامية سهلة وبسيطة على كل اللي يقراه، كمان ينفع نصنفه ككتاب ساخر تقراه علشان تضحك شوية، وتقرأ حواديت مش عارف إيه نهايتها، واللي بتكون عبارة عن خواطر عن مواقف وتجارب شخصية.

- بالطو وفانلة وكاب لـ "أحمد عاطف"
كتاب يهون على الدكاترة مرارة الأدوية اللي بيصرفوها للعيانين، ممكن نقول عليه كتاب ساخر لكل دكتور عاوز يفصل شويتين تلاتة عن جو الطب.

Comments: