أماكن تجنبها في الفلانتين لو أنت سينجل!

13/02/2019

أنت كسينجل في أماكن كدة مش لازم تعدي من جنبها خالص في الفالنتين ودة لمصلحتك والله علشان ميجلكش أكتئاب وتسمع عمرو حسن ياااا لوحدك!أصلًا نزولك الشارع في اليوم ده ممكن يشكل مصيبة على صحتك، لأنك هتشوف كمية أحمر هتضر بحالتك النفسية.

لو كنت مضطر تنزل  الفلانتين لأنه مش أجازة رسمية للأسف حاول تبعد عن الأماكن اللى بتطل على النيل سواء كانت مطاعم بقى ولا كورنيش، أحذر علشان مترجعش تقول محدش قالي.

ماتدخلش أي مول عمومًا.. خاصة السينمات في اليوم ده أولًا لأنه ضرب نار ومش هتلاقي تذكرة وتاني حاجة أنه ياما هتلاقيه رومانسي وبس أو لما تدخل هتحس إنك نسيت تخبط قبل أمام تدخل!

ماتروحش الشغل عشان هتلاقي زمايلك المرتبطين بيحبوا على بعض في التليفون وكلهم قاعدين قدام الكمبيوتر على وشوشهم ابتسامات بلهاء!

ابعد عن الحدائق العامة عشان بيكون فيها كمية تلزيق تدخل السجن!

ماتقعدش مع صحابك السناجل على قهوة ولا كافية لأن الكلام هيجيب بعضه وتسترجعوا علاقتكوا الفاشلة وتروح وأنت بتعيط على أغاني تامر عاشور في عربيتك.

حتى قعدة البيت مش هتعرف تتهنى عليها، هتفتح التلفزيون علشان تتفرج على فيلم ولا مسلسل هتلاقي إعلانات وأفلام عن الفلانتين وقلوب وورد وحاجة تفقع المرارة.

طبعا أنت بتفكر لو الدنيا مقفلة كدة ما أسافر بعيد عن المدينة وأريح دماغي؟! للأسف ده يوم عالمي يعني كل حتة هتلاقيها بتحتفل بالفلانتين.. معلش.



 

Comments: