10 نصايح لنميمة آمنة وممتعة

14/02/2019

النميمة والرغي اللي ملوش لزمة بيبقى من أجمل لحظات أي بنت، لحظات مقدسة جدا، بتبقوا محظوظين لو عندكوا وقت تقعدوا قعدة النم دي أكتر من مرة في اليوم وتعرفوا حاجات عن الشلة والصحاب والمجموعة المحيطة بيكم، لإن يوميا حاجات بتتجدد واللي بيفوت عليها حاجة صعب يتحكلها اللي اتقال تاني في حلقة جديدة من مسلسل النميمة النسائية الجميل.

النم عموما عشان يطلع بأحسن جودة لازم تتبعي شوية الخطوات دي:

1- ماتفتحيش قلبك في النم كده لأي واحدة وخلاص، نمي مع حد تعرفيه كويس زي الصحاب القريبين، أو الأهل و القرايب، أو أي حد يبقى  ثقة، عموما يعني ماتمشيش تدلدقي بالكلام كده عشان النم لو خرج أو وصل للشخص "المنموم عليه" الموضوع بيبقى محرج جدا.

2- ماتنميش برضه على أي حد وخلاص، استني لما حاجة تحصل واتكلمي وارغي عليها، بس بلاش مبدأ "النم من أجل النم" لأن النم من غير سبب إهدار لطاقة مهمة وفريها "لنماية" مهمة.

3- نبه الناس اللي حواليك إنك هتنم عشان لو فيه حد من اللي بتنم عليه جايين يقولك.

4- اتفق على إشارة مع اللي هينم معاك عشان يقولك توقف كلام بيها لو فيه حاجة غريبة داخله عليكوا.

5- نمي في جماعات أحسن ما تكرري النم كل شوية ونفسك يتقطع من كتر الكلام.

6- اتأكدي إن المكان اللي بتنمي فيه محدش هيسمعكوا منه، اقفلي الباب أو الشباك أو أيا كان بس خدي بالك من تأمين المكان.

7- فيه حركة أروش كمان ممكن تشغلي مزيكا عشان صوت المزيكا يغطي على صوت الكلام.

8- ركزي كويس في التجمعات سواء في الشغل أو في العيلة أو مع الصحاب عشان تلاقي حاجة تنمي فيها.

9- خليكي متجددة دايما في نمك، بلاش تنمي على نفس الأشخاص أو نفس الحوارات كل مرة عشان اللي بتنمي معاهم مايملوش منك والموضوع يفقد حماسه.

10- ماتنميش لو مابتعرفيش، اتعلمي وطوري من نفسك لو عندك الحماس للنميمة.

Comments: