ليه بنتراجع في قايمة أولويات صحابنا؟

17/02/2019

اتفقنا أو اختلفنا على جملة "الدنيا وخداني" بس هي جملة واقعية، المسؤوليات وتطورات الحياة بتخلي الواحد ملزم عن حاجات وأشخاص، فبالتالي نظام يومه وترتيباته بتتغير، عشان كده الأشخاص اللي بيبقوا في فترات بيلعبوا دور أساسي في حياتك ممكن بعد فترة يتحولوا لأشخاص ثانويين من غير ما تاخد بالك، يعني بدل ما كنت بتشوفهم كل يوم هتشوفهم في الويك إند أو لما تبقى فاضي.

التغيير ده بيبقى مش مُتقبل في الأول، غالبا ما هتلاقي نفسك رفضه وبتسأل هو أنا مابشوفش الناس دي ليه؟ أنا فين السوشيال لايف بتاعي؟ وأكيد هتلوم نفسك في الأول وهتحاول تصلح الدنيا، بس لو إنت المفعول به مش الفاعل، يعني لو إنت اللي حاسس إن كل صحابك مثلا الشغل واخدهم أو اتجوزوا أو الحياة خدتهم بشكل ما ومابقيتوش تشوفوا بعض إلا في الأعياد والمناسبات الرسمية الموضوع هيبقى مؤثر، وهيضايقك مهما حاولت تلتمس أعذارهم ومبرراتهم.

بس لو حاولت تبص للموضوع بطريقة عملية أكتر هتلاقي إن الحياة أولويات، وفعلا بالمنظور العلمي احتياجات الإنسان متقسمة لأولويات، أبراهام ماسلو حط نظرية عن التحفيز البشري اسمها هرم الاحتياجات وقسم فيها احتياجات الإنسان لـ 5 احتياجات وهما:

1- القاعدة: الاحتياجات الفسيولوجية:

وهي الاحتياجات المتعلقة بأساسيات الحياة زي الأكل والشرب والمأوى

2- احتياجات الأمان:

وده اللي بيضم حاجة الفرد للأمان والحماية في أحداث حياته اليومية والجسدية والعاطفية

3- احتياجات الاجتماعية:

وهو بيقوم على أساس رغبة الشخص إنه يكون مقبول كعضو في جماعة، والاحتياج بيتضمن الرغبة في الحب والعطف

4- احتياجات تقدير الذات:

وهو عبارة عن حاجة الشخص للاحترام وتقدير ذاته والمكانة الاجتماعية، وبيتضمن الإحساس الذاتي بالكفاءة

5- احتياجات تحقيق الذات:

وده أعلى مستوى من الاحتياجات، وهو مرتبط برغبة الفرد في تحقيق الذات وإنه يعمل أقصى حاجة يقدر عليها عن طريق تنمية قدراته واستخدمها بطريقة فعالة والاستفادة منها بأحسن طريقة ممكنة.

وفقا لهرم الاحتياجات ده فهنلاقي إن أولويات الشخص بتتعارض مع حياته الاجتماعية بشكل خاص وبتتعارض مع وجودك وحضورك في حياته، لأنه بيبقى بيسعى لتحقيق احتياجات مادية وساعات معنوية أهم، وده يمكن أكبر سبب بيخليه يبعد عن الناس خصوصا في فترة ما بعد الـ 25 أو 30 لإنه بيدي أولولية لتحقيق احتياجاته وتحقيق نفسه وذاته أكتر، عشان كده حاول تستوعب دوافع الناس لو حد بعد عنك و تبطل تجلد ذاتك لو إنت اللي بعدت عنهم.

Comments: