عادات الزواج في مصر من نقل العفش لحد يوم الصباحية

17/02/2019

لكل بلد وكمان كل محافظة هتلاقي عادات راسخة بتتنقل من جيل لجيل، ممكن يكون فيها شوية تغيير حصل في الثقافة وحاجات تتنسى بس رغم ده فيه عادات لسه موجودة، لأن فيه ناس حريصة على توارثها، في مصر فيه عادات متوارثة بتحصل من قبل يوم الدخلة ولحد الصباحية تقريبًا، هنشوفها مع بعض في الموضوع ده.

- تجهيز العروسة
العروسة قبل فرحها بشهر ولا حاجة بتكون حاجزة عند "beauty center" وبشكل أسبوعي أو يومي بتكون ليها زيارة هناك، مش عارفين نقول إيه بس حسبي الله يعني.

- كتب الكتاب والقايمة
مشهد مكرر إن أم العروسة بتكون محضرة فواتير كل الحاجات اللي اشترتها، أهل العريس داخلين بفكرة  هنخرب الجوازة لو مضمناش حق ابننا في المؤخر وغيره، فالمنافسة بتكون عالية جدًا في الفقرة دي.

- الشبكة والدهب  
كيلو دهب للعروسة ودي يمكن عادة منتشرة عن الصعايدة، لو كانت الخطوبة دبلتين خطوبة فقبل الفرح لازم تكون فيه شبكة إلا لو أهل العروسة مش عازين وده طبعًا عكس فكرة إنها هدية من العريس للعروسة ومش فرض!

- مزمار بلدي
فقرة المزمار لازم تكون موجودة أيًا كان يوم الحنة أو التنجيد أو نقل العفش المهم إنها فقرة لازم تكون موجودة ورقص العصاية والجيران تبدأ تخرج من البلكونات وزغاريد من كل مكان.

- تقديم الهدايا للعروسة أو زي ما بيتقال عليه الواجب
كميات كبيرة من الزيت والسكر والمكرونات وغيره بتروح لأهل "الزغاليل" بهدف الواجب ده غير الفلوس اللى تتكرمش في أيد أهالي العروسين بهدف المشاركة الإنسانية والدعم المادي ده طبعًا بعد سيل من الحلفان لا والله ما يحصل لا والله أنا حلفت الأول.

-تحضيرات وتجهيزات قبل نقل العفش
بعد تحديد يوم الفرح بتيجي مرحلة تجهيز العفش على نقله ونخص بالذكر هنا العروسة أهلها، فتلاقي شقة أهل العروسة مكركبة ومجهز الحاجات على النقل وتطلع كل الرفايع من تحت السرير وفوق الدولاب ومن عند الجيران وحالة من الانبهار تعم المكان لأن فجاءة العروسة بتفتكر الحاجات اللى جابتها ونسيتها وتبدأ حالة الحنين تاخدها.

- نقل العفش
اليوم اللى بيكون برعاية ياللي على الترعة حود على المالح وطبلة وأغاني شعبية، بعد الهلكة اللى قبلها بيوم، بتيجي مرحلة إننا نوري الناس ازاى العروسة جاتلها أحلى حاجة في الكون، ونتفشخر.

- فرش شقة العروسة
لما تلاقي كراتين كتيرة قدام باب شقة الزغاليل أعرف أنه حان الوقت تطلع الرفايع للنور والناس تنبهر وتبدأ العروسة توزع حاجة صغيرة من حاجاتها على اللى بيفرشوا معاها الشقة قال يعني كدة هتخزي العين.

- ليلة الحنة
أهم حاجة في اليوم ده الحنة اللى بيحطوا فيها 3 شمعات والعروسة ترقص بيها وسط جماهيرها، والزغاليل الاتنين يحطوا حنة في ايديهم ورجلهم وده مـــــــــــــهم جــــــــــــــــــداً

- وجبة قبل يوم الدخلة
الوجبة دي بتكون فيها كل الفسفور والأكلات اللى تدي العريس طاقة كأنه داخل على مهمة قومية لازم، ده غير الوجبة اللى بيروح يلاقيها يوم الفرح نفسه!

- الصباحية والأكل
أهل العروسة مش بيرحوا أيديهم فاضية في الصباحية، بعد الوجبة التقيلة اللي هتلاقيها موجودة يوم الفرح فيه واحدة زيها بالظبط يوم الصباحية بيسبقها حفل هائل من الزغاريد.

- توزيع الأكل على الجيران بعد الفرح
لازم الجيران تاخد من أكل العروسة بس مش عارفين دة لسبب إنهم يخزوا العين برضه ولا عادي بدافع الكرم لسه الدراسات متوصلتش لسبب علمي!


 

Comments: