ضوافرك بتدل على شخصيتك: اعرف شكلها بيقول إيه عنك!

18/02/2019

كل شخص وله أفكاره وصفاته اللي بتعبر عن شخصيته، نفس الكلام برضه مع أفعال الشخص أو شكلة الخارجي، اللي بيعبروا عن شخصيته، فمثلا شكل ضوافرك بيعبر عن شخصيتك، زي مثلا الشيء المتعارف عليه في مجتمعنا إن لو حد بيقرقض ضوافره فهو كده غالبا متوتر أو بيعاني من شوية قلق على مشاكل.

أكيد كل شخص له شكل ضوافرة الخاصة اللي مولود بيها بس الشكل اللي بتقص ضوافرك به بيدل على شخصيتك، عشان كده موقع Little Things قال شوية تفاصيل متعلقة بشخصيتك من نوع ضوافرك واللي هي:

1- الضوافر الطويلة العمودية:

الأشخاص اللي بيفضلو ضوافرهم تكون طويلة وعمودية غالبا ما بيبقوا شخصيات رومانسية وهادية.

2-الضوافر العريضة الواسعة:

لو ضوافرك أعرض أكتر ما هي أطول، فانت غالبا شخص بسيط ودماغك متفتحة، وشخص بيستخدم التفكير المنطقي أكتر وده بيميزك عن الناس اللي حواليك، وعشان كده ممكن تتفهم إنك شخص بتحب تجادل.

3- الضوافر البيضاوية:

لو ضوافرك بيضاوية أو مدورة فده معناه إنك شخص بتفتخر بوجود ناس كتير حواليك، ده غير إنك شخص بتبقى على الوعود وبتعمل أقصى ما عندك عشان تخلي اللي حواليك مبسوطين.

4- الضوافر المربعة:

الضوافر المربعة شكلها جد أوي وصحاب الضوافر المربعة زيها برضه، غالبا أصحاب الضوافر المربعة مابيحبوش الاختلاط بالناس أوي وبيحبوا يبقوا مستقلين، وبالرغم من كده فهم أشخاص ممكن تعتمد عليهم وبيظهروا كفائتهم في وقت ما تحتاجهم.

5- الضوافر المثلثة:

الضوافر المثلثة ممكن تبقي على شكل "A" أو ممكن تبقى على شكل "V"، بس في الحالتين صحاب الضوافر المثلثة بيبقوا أشخاص حساسة، ومبدعين.

6- الضوافر على شكل لوزة:

بصيت قبل كده على ضوافرك ولقيت إنها شبه اللوزة؟، وهما أشخاص بيميلو إنهم يبقوا صادقين ومخلصين، وبشكل عام هما نوع الأشخاص اللي ممكن تعتمد عليهم

7- الضوافر المدببة:

ده شكل ضوافر غير عادي وغالبا هو من سمات الأشخاص الطموحة واللي عندها روح مبادرة حلو، وهو شخص بيحب السفر.

عموما احنا مش عارفين الكلام ده علمي ولا لا، عايز تصدق صدق مش عايز تصدق اعتبره هبده وراحت لحالها.

Comments: