قاموس الشتايم القديمة.. زمن التهزيق الجميل!

19/02/2019

لما تلاقي حد من صحابك بيشتم ويقولك يا بلغة اعرف أنه بيقعد مع جده كتير، جدودك بنسبة كبيرة كان  ليهم في الشتايم اوعى تكون فاكر إن طول عمره شخص وقور كدة زي ما أنت شايفه دلوقتي بس شتايمهم رغم إنها كانت قديمة إلا إنها كانت كريتيف برضه وقتها.

هنا حاولنا نجمع أشهر شتايم زمان وخاصة القرن العشرين:

محن
دي معناها الدلع أو السهوكة أو اللي عنده رغبة جنسية ظاهرة للناس اللى حواليه بيتقال عليه ممحون، وهي من الشتايم اللى لسه مكملة لحد دلوقتي

 

يا جعر
دي بتتقال لأي حد مبهدل في نفسه كده ومش مهتم بمظهره وبتروح أكتر للشخص اللى بيقوم بتصرفات مقززة للي حوليه.

 

يا طايش
بتتقال للشباب دايمًا ومعناها الجرىء المتهور وغير مسئول

 

يا بقف
ودي علشان نوصف بها الشخص اللى معندوش دم ولا إحساس وكمان بيتوصف بها الشخص المتسرع التافه


يا ابن الصرمة
معناها حديثًا يا ابن الجزمة


يا عديم المفهومية
اللى فهمه بطئ ومش بيفهم بسرعة وغبي


يا صفيق
الشخص الوقح اللى معندوش حياء

أهوج
لما حد يتصرف قدامك بتسرع أو اندفاعية

أرعن
أرعن ده الشخص الأحمق اللى بيتصرف بطريقة فظه  

يمهيص
هايص أو يمهيص وهو الراجل اللى بيحب اللعب الكتير والهيصة وملهوش في الجد خالص، وحديثاُ هو الزياط!  

نمرود
لما تيجي توصف حد بانه متكبر وتنك في نفسه قوي.

مدهول
ودي بتتقال لأ حد مرتبك أو مندهش دايما ومش منتبه للي بيعمله  

لكعي
بتتقال اللناس اللى تتباطأ في خطوتها بقصد واللكاعة دي معناها لؤم أو حماقة!

فلان ده شرابة خٌرج
دي بتتقال لأي حد ملهوش فايدة، يعني لا بيحل ولا بيربط

اسكعك
يعني هلطشك وبتتقال هسكعك قلم يعني هديك بالقلم

متيس
يعني بيعمل تصرفات وقحة في العموم، وبتتوصف للشخص اللى قاعد مش بيعمل أي حاجة

يا دون
ودي بتتقال علشان توصف واحد استندل معاك وطلع واطي!

دوغف
ودي بتتقال لأي حد صريح بغشومية وبيقع في الكلام بسرعة

Comments: