أنواع الناس في حفلات المزيكا

20/02/2019

في حفلات المزيكا الناس أنواع، ورغم المشهد العبثي اللى بيكون فيه الناس فوق بعضها، واليوم بيكون برعاية زحمة يا دنيا زحمة، إلا إن الناس ليها ردات فعل مختلفة جدا على فرحتها وأكيد لو بتحب تحضر حفلات هتلاقي نفسك في واحد من الناس دي.

- الناس اللي بتصوت
إحنا عارفين كلنا إن الملبوس بيصوت لما يسمع حاجة دينية بس الصويت في الحفلات ليه؟! تقريباً بيبقى عليه "جوست" بس من الكبت وطاقة سلبية وبيخرج عفريتها مع المزيكا اللي بيحبها ويتجدد نشاطه تاني.

- الناس اللي بتزغرط
مرة واحدة الباند بيعزف مزيكا والناس مبسوطة لا بينا ولا علينا تلاقي واحدة راقعة زعروطة وبعدها ترجع تكمل تسقيف عادي جدًا، ودي بتعمل ميكس عظيم بين المزيكا المعاصرة وثقافتنا المصرية الأصيلة في التعبير عن الفرحة بالزغاريط!

- الناس اللى بتسقف وايدها لفوق
هتلاقي مجموعة كدة بتسقف وايدها لفوق علشان تقول للباند "إحنا هنا إحنا هنا إحنا هنا" ودول بيبقى جواهم روح أولتراس مشجعين كورة صغيرين، وبيتعاملوا مع الحفلة زي الماتش في الاستاد.

- الناس اللي بتسقف على الهادي
الناس دي بتسقف بـ 300 جنيه اللى دفعتهم في التيكت بتاعة الحفلة علشان مكنتش على هواهم إما  رايحنها غصب أو طلعت حفلة فكسانة.

 

- الناس اللى جاية تتفرج
هو العلم لغاية دلوقتي مش عارفين هي الناس جاية تتفرج على إيه بالظبط يعني دي حفلة مزيكا مش أوبرا عايدة، إما تهيص معانا أو شوف حل في الوقفة المريبة اللي بتبقى واقفها وسط الناس دي!

- الناس اللي مقضينها رقص
الناس دي جاية عارفة هي جاية المكان ده ليه وبتعمل إيه بالظبط، هما جايين لسبب معين يخرجوا كل الطاقة اللي جواهم بالرقص، هيرقصوا في بداية الأغنية وأخرها وفي البريك بين الباندات وفي الفواصل وكل ثانية مش هتفوت إلا وهم بيرقصوا.

- أبو يافطة
الشخص اللى بتلاقيه رافع طول الحفلة يافطة عليها اسم الباند، أغنية من أغانيهم المهم يرفع حاجة، بس تيجي تكلمه يابني طب الأغاني؟ طب الحفلة؟ طب صوت مع أخواتك، مفيش، هو جاي في مهمة سامية وهيأديها للنهاية.

- الناس اللي جاية تشقط
دول مش محتاجين شرح، دول لا تفرق معاهم الباند ولا الحفلة ولا أي حاجة، هم جايين لهدف واحد فقط وهيحاولوا بكل الوسائل إنهم ينجحوا فيه، ومفيش فرصة أفضل من الحفلة عشان كدة.. تيك كير منهم.

Comments: