دليلك لسهرة أوسكارية ممتعة

24/02/2019

الأوسكار الليلة دي الساعة 3 الفجر بتوقيت القاهرة، ولكل محبي السينما عشان تلحق تقضي سهرة أوسكارية لطيفة ومثمرة ده دليلك الوافي لليلة النهاردة.

طبعا الأول بعيد عن الجوايز والترشيحات فأهم حاجة هتعملها إنك تروح بدري النهاردة عشان تنام بدري وتصحى الساعة 3 الفجر وأنت مجهز فشارك وتساليك وفاكهتك.

وعشان الوقت اتأخر اخترنالك أهم الأفلام اللي ممكن تتفرج عليها عشان تتفرج على الحفلة وأنت مش حاسس إنك أطرش:

  • لو أنت من محبي الأفلام الموسيقية الغنائية فلازم تشوف واحد من دول:
     

1- Bohemian Rhapsody:

طبعا ده أهم فيلم نتفرج عليه عشان ابننا اللي مشرفنا "رامي مالك" وأداءه العالي اللي في الفيلم.

قصة الفيلم بتدور عن "فريدي ميركوري" وفرقة "Queen" الإنجليزية, الفيلم سيرة ذاتية لفريدي وبيوثق أهم الأحداث لصعود الفرقة اللي قادتهم للظهور في الحفلة الموسيقية التاريخية (Live Aid) سنة 1985.

2- A star is Born:

الفيلم الغنائي التاني المنافس في الجوايز السنة دي وهو أول تجربة سينمائية لمغنية البوب الشهيرة ليدي جاجا وأول تجربة إخراجية لبرادلي كوبر، وهو دراما رومانسية موسيقية رائعة هتاخدك في عالم مميز جداً.

  • نتفيلكس أند تشيل
     

Roma:

لو عامل اشتراك في نيتفلكس أو مقلب أكونت واحد صاحبك، استغل الكلام ده واتفرج علي فيلم "روما" النهاردة قبل الأوسكار.

هو فيلم دراما وقصة الفيلم بتدور عن أحداث عيلة من الطبقة المتوسطة في المكسيك لمدة سنة كاملة في أوائل السبعينات وطبعا إخراج المخرج العبقري ألفونسو كورون وإنتاج نتفليكس.

  • أفلام السوبر هيروز
     

Black panther:

لو بتحب أفلام السوبر هيروز اتفرج على فيلم Black panther

قصة الفيلم عن قصة (تشالا) ملك (واكاندا) الأفريقية، اللي بيحكم المملكة، وبيواجه مشاكل الأعداء اللي من داخل المملكة وخارجها وهو أحد أفلام عالم مارفل السينمائي وهو أول فيلم كوميك يترشح لجايزة أحسن فيلم في الأوسكار في التاريخ.

  • لو بتحب أفلام السير ذاتية ودراما
     

1- BlacKkKlansman:

لو بتحب أفلام "سبايك لي" زي Malcolm X و Inside Man فهو مخرج ومؤلف الفيلم ده.

الفيلم كوميدي وقصته عن (رون ستالوورث) ضابط شرطة أفريقي أمريكي من (كولورادو)، بينجح في التسلل لواحدة من تجمعات (كو كلوكس كلان) المحلية - وهي حركات بتأيد بعض المواقف الرجعية المتطرفة والعنيفة ضد السود - لحد ما يبقى رئيس لواحد من الجمعيات دي.

2- Vice:
 

الفيلم بيحكي عن قصة حياة (ديك تشيني) نائب جورج بوش الابن، وهو أقوى نائب رئيس عرفه التاريخ الحديث، وإزاي سياسته قدرت تغير العالم، الفيلم من بطولة كريستيان بيل وحاز على إشادة نقدية كبيرة وحصل كريستيان بيل على الجولدن جلوب لدوره في الفيلم.
 

  • لو بتحب مزيكا الأفلام

 عايز تجهز نفسك وتدخل في المود فأبلكيشين "أنغامي" كمان بتحتفل بالأوسكار وعملت بلاي ليست لأغاني من كل الأفلام اللي مرشحة للأوسكار 2019
 

  • دحيحة السينما

    ولو إنت شخص بتلاقي متعة في السينما أكتر من إنك تشوف الأفلام في البيت، روح زاوية وسط البلد النهاردة أو بكرة أو بعده لإنهم بيعرضوا الأفلام المرشحة لأوسكار 2019.






 

Comments: