أنواع المزيكا الغربي وإزاي تفرق بينهم

14/03/2019

بحكم إننا عرب وأغلب المزيكا اللي بنسمعها بتبقى مزيكا شرقي أو عربي فهنلاقي إننا بنعرف نفرق بين أنواعهم وإحنا بنتكلم ومن غير ما ناخد بالنا.

بنعرف الأغنية دي نوع مزيكتها تخت شرقي ولا شعبي ولا موال ولا موشح ولا "راي" من غير ما نفكر لإننا اتربينا وسمعنا من صغرنا أنواع المزيكا دي بشكل يومي.

بس مش كلنا بنعرف نوع المزيكا الغربي اللي بنسمعه، هنلاقي اللي بيهتموا وبيسمعوا أغاني غربية هم اللي عارفين يفرقوا، بس مش كلنا نعرف نوع المزيكا دي حتى لو بنحبها وبنسمعها.

المزيكا الغربي الكلاسيكية بتتصنف لـ 51 نوع تقريبا لكن أشهرهم أو أكترهم أهمية هم 10 أنواع وهي:

1-البوب:

خبراء مزيكا الشعوب بيقولوا إن أول ظهور لمزيكا البوب كانت العشرينات من القرن الـ 20 وهي عبارة عن مزيج بين المزيكا الحزينة "البلوز" ومزيكا "الكونتري" الصاخبة وقتها وغنا الغجر اللي هو "hillbilly".

وأصل تسمية النوع ده من المزيكا بالبوب لإن نقاد أطلقوا عليه "Having popular appeal" وهو القبول الشعبي الكبير واللي كانت وقتها أشبه باستغاثة الناس اللي بتعاني لإنها كان مزيج بين مزيكا وغنا وأشعار الفقرا والمنبوذين.

بعد كدة في الستينات اتطورت المزيكا دي وبقى اسمها "Popular music" ومنها اتطور اختصارا لـ"pop music".

وأول بداية لظهور البوب للجمهور كانت في الخمسينات عن طريق المطربة الأمريكية "بيتي بادج" ونجحت جدا وده اللي شجع مغنيين زي "فرانك سيناترا" و"دين مارتين" يغنوا بوب، وفي الستينات استقلت مزيكا البوب عن الروك بأنواعه.

وفي التمانينات ظهر مجموعة جديدة من المغنيين اللي غنوا بوب زي على رأسهم ملك البوب "مايكل جاكسون" و"مادونا" وفي التسعينات "بريتني سبيرز" و"جينفر لوبز"وحاليا "ليدي جاجا"

انتشرت مزيكا البوب في الوطن العربي كمان خصوصا بعد تطور تقنيات التسجيل في الاستديوهات ودخول تراكات الصوت في التسجيل، وظهرت فرق في الأول بتغني على مزيكا البوب زي فرقة "المصريين"، "الجيتس" و"الفور إم" ومغنين فرديين كمان غنوا بيها زي محمد منير، ومحمد فؤاد، وعمرو دياب، وتامر حسني، وغيرهم من مطربين الشام والخليج.

2- البلوز:

مزيكا البلوز هي مزيكا مختلفة لإنها خليط بين ثقافتين، الأفريقية والأمريكية،  في الوقت اللي اتنقل فيه ملايين من الأفارقة لأمريكا كعبيد خدوا معاهم ثقافتهم ومزيكتهم، فكانوا بيغانوا كتير لإيمانهم إن الغناء هيخلي معاناة الشغل أسهل، ولحد انتهاء العبودية فضل موجود النوع ده من المزيكا.

الآلات اللي كان بيتم استخدامها في موسيقى "البلوز" قليلة نسبيا بس أهمها البيانو والبانجو "آلة وترية" وفي التلاتينات انتشر نموذج العزف "بوجي ـ ووجي" على البيانو، لكن حاليا بيتم استخدام الآلات الحديثة زي الطبول وآلات الإيقاع، وغالبا كلمات أغاني البلوز بتبقى بتدور عن الحب والفقر والعنف والعلاقات الاجتماعية أو العنصرية أو الموت.

اتطورت مزيكا البلوز وظهر نوع تاني منها اللي بقى اسمه البلوز-روك، وهو عبارة عن مزيج بين الروك والبلوز، ده غير إن البلوز كان سبب ظهور أنواع تانية من المزيكا زي البوب والروك أند رول والهيب هوب.

من أشهر مغنيين البلوز روبرت جاكسون، وبيسي سميث، وبوكا وايت وطبعا ملك البلوز رايلي بي. كنج.

3- الجاز:

مزيكا الجاز هى مزيج بين الأنغام الأوربية والإيقاعات الأفريقية، وظهرت في أمريكا في القرن العشرين، واتعرفت في الأول إنها المزيكا اللي بتبقى في الحانات بس دلوقتي ممكن نسمعها في كل مكان عادي وفي أغاني كتير.

و ما ينفعش طبعا نتكلم عن الجاز وما نتكلمش عن "لويس أرمسترونج" لإن هو اللي خلى مزيكا الجاز مزيكا مختلفة وفريدة من نوعها وخلاها تعتمد على الارتجال أكتر، لويس أرمسترونج هو لاعب بوق ويعتبر هو أب الارتجال الحديث في الجاز، بفضل لويس أرمسترونج وغيره في توصيل الجاز للإذاعة بدأت شعبية الجاز تزيد، وفي الأربعينات بدأت قاعات الرقص تتملي ناس عشان يسمعوا ويرقصوا على فرق الجاز الفترة دي كانت في الأربعينات واتعرفت الرقصة باسم "Swing" نسبة للإيقاعات اللي استخدموها وقتها.

اتقسمت مزيكا الجاز لـ 3 أنواع وهما:

1- الجاز الجاد: وهو مزيكا الجاز اللي من غير ارتجال عن طريق النوتة الموسيقية.

2- الجاز البارد: اختفى منه الارتجال خالص وبقى يعتمد على الإيقاعات البطيئة اللي بتميل للعاطفة.

3- السيمفوجاز: وهو اللي بيتم الابتعاد فيه عن فرقة الجاز التقليدية اللي بتتكون من 7 أو 8 أفراد، وبتشمل الفرقة كل آلات الأوركسترا السيمفوني وزيادة عليهم فرقة الجاز التقليدية.

من أهم عازفين الجاز تشارلي باركر، ثيلونيوس مونك، جون كولتراين، مايلز ديفيس وتشارلز مينغوس.

4- ريذم أند بلوز:

مزيكا الريذم أند بلوز هي مزيكا عالية وكلها حيوية، لإنها بتعتمد على الإيقاعات والطبول، الإلكتريك جيتار، واللي كان بيغني رجالة أو ستات بس المهم صوتهم يبقى عالي، وانتشرت المزيكا بسرعة وقتها، فبدأت الفرق الكبيرة كمان تضم آلات البيانو والبوق والساكسفون، المزيكا دي كانت من أهم مميزاتها إنها حلوة جدا في الرقص، وفي نص الأربعينات كانت بدأت فرق كبيرة زي  T-Bone Walker و Louis Jordan's "Tympany Five" وحققوا أعلى مبيعات لتسجيلاتهم.

5- روك أند رول:

مزيكا الروك هي عبارة عن مزيج بين البلوز والكونتري والفلوك، استخدموا فيها نفس الآلات تقريبا اللي استخدموها في الريذم أند بلوز، وده كان السبب اللي خلى الروك أند رول تنتشر في الراديو وبدأت تعجب المراهقين عشان بيرقصوا عليها، ومن أول الفرق اللي ظهرت ولعبت مزيكا الروك أند رول هي "بيل هايلي".

لكن مزيكا الروك أند رول الناس الكبيرة كانت شيفاها خطر على ولادها خصوصا لما شافوا "ألفيس بريسلي" بيرقص عليها، لإنهم ماكنوش عارفين يعملوا حاجة عشان يمنعوا ولادهم من إنهم يحبوه أو يتفرجوا على رقصه.

"ألفيس بريسلي" كان واحد من أهم الفنانين اللي نشروا الروك أند رول في العالم كله مش في أمريكا بس وله أغاني كتير اتشهرت زي  Hound Dog, Heartbreak Hotel و Jailhouse Rock، وبعدها اتعرف بملك الروك.

ومن الفرق العربية اللي بتغزف مزيكا الروك دلوقتي هي "مسار إجباري" و "مشروع ليلى" و"المربع".

6- الراب:

هو جزء من فن "الهيب هوب" أصلا اللي انتشر في أمريكا في السبعينات وبدأ ينتشر في العالم كله في التسعينات، النوع ده من المزيكا بيعتمد على تسليم القوافي والتلاعب بالألفاظ عشان تمشي مع القافية من غير الالتزام بلحن معين، وممكن يتم غناء الراب بإيقاع أو من غيره وده اللي بيسمى بالفري ستايل، وبشكل عام صوت المغني أو المغنية مش المعيار في أغنية الراب لأن أهم حاجة في الراب الكلمات ونبض الأغنية.

7- الميتال:

نوع من أنواع مزيكا الروك اللي اتطورت في السبعينات، من أهم الحاجات اللي بتميز الميتال هو صوت الجيتار القوي مع صوت الدرامز وصوت الإلكتريك جيتار، غالبا ما بتدور كلمات أغاني الميتال عن الموت وقصص الفنتازيا والميثولوجي والحروب والحزن وخصوصا المشاكل الاجتماعية والسياسية.

بدأ النوع ده من المزيكا بالظهور في أول التمانينات، وأول الفرق اللي ظهرت كانت فرقة Black Sabbath، اتواجهت مزيكا الميتال بالرفض من فئات كتير بسبب اعتقادهم إنهم موسيقى شيطانية.

من أشهر أغاني الميتال LED ZEPPELIN – COMMUNICATION BREAKDOWN وBLACK SABBATH – WAR PIGS و Speedica – Laws of Metal و Andromeda – The Words Unspoken

المزيكا الميتال ليها أنواع زي: الثراس ميتال، السبيد ميتال، ميتال كور، البلاك ميتال أو الديث ميتال، النيو ميتال أو الراب ميتال، والبروجرسيف ميتال.

8- الهاوس ميوزيك:

هي نوع من أنواع مزيكا الرقص الإلكترونية اللي بدأت ظهورها في التمانينات، وده لما بدأ الدرامز يبقى أرخص ومنتشر أكتر، الهاوس عبارة عن مزيج بين مزيكا الـ Desco والـ Dj، وأول واحد احترف إنتاج النوع ده من المزيكا كان "فرانكي ناكليس" وهو كان أول يختار إنه يحط نمط موسيقى جديد إيقاعة منخفض، وأصوات قريبة من مزيكا الفانك.

وفي نص التمانينات بقت مزيكا الهاوس منتشرة في نوادي شيكاغو، وفي نهاية التسعينات اتقسمت مزيكا الهاوس لـ Acid House – Deep House – Hip House – Hard House، وأنواع تانية كتير.

من أشهر أغاني الهاوس: New Order – Power, Corruption and Lies، Frankie Knuckles – Beyond the Mix، Faithless – Reverence.

9- الكانتري

هي نوع من المزيكا الأمريكية الشعبية المرتبطة بالثقافة الريفية والإقليم الجنوبي، واتطورت في القرن الـ19 وبقت عبارة عن دمج كذا نوع من المزيكا زي البلوز الريفي، والمزيكا الشعبية البريطانية والمزيكا الدينية.

في بدايات القرن العشرين انتشرت الكانتري على الإذاعة وفي الأسطوانات وانتشرت اكتر واكتر بعد الحرب العالمية التانية ونشطت حركة تجارة الموسيقى وقتها.

ومن مميزات الكانتري تنوع الآلات الموسيقية المستخدمة فيها على حسب اختلاف نوع المزيكا، بالإضافة كمان إن قصص الأغاني بتبقى جزء من المزيكا، ومواضيع الأغاني بيكون ديني أو اجتماعي أو هزلي.

من أشهر أغاني الكانتري: Beautiful crazy، Meant to be ، This is it، speechless، Girl like you

Comments: