ليلة إمبارح: ملخص لكل اللي فاتك في حفل الأوسكار 2019

25/02/2019


النهاردة الفجر 25 فبراير كان حفل توزيع جوائز الأوسكار 2019 لنسختها الـ 91 في مسرح دولبي, ولو أنت من اللي فات عليهم ليلة "الذهب" إما إنك معندكش اشتراك القناة المشفرة اللي بتتعرض عليها أو النت عندك ضعيف وملكش خلق تقعد تجري ورا اللايف استريم بتاعها أو إنك عندك شغل أو امتحانات تاني يوم فنمت بدري، فاحنا جمعنا لك خلاصة اللي حصل في حفلة إمبارح في الموضوع ده:
 

  • "رامي مالك" بطل الحفلة
     

لو أنت بتضايق من حب المصريين لرامي مالك وبتضايق إنهم بيقولوا عليه "مصري" فمتزعلش نفسك, رامي نفسه يحسم الجدل وذكر ده بفخر في نهاية خطاب فوزه وأكد على إنه "ابن لمهاجرين مصريين" ومن الجيل الأول من الأمريكان ذو الأصول المصرية كرسالة واضحة إن الفرصة والأمل مفتوح للجميع إنه يحقق أحلامه يوماً ما وده بعد فوزه بجائزة الأوسكار كأفضل ممثل في دور رئيسي عن دوره في فيلم Bohemian Rhapsody وبكدة يبقى أول ممثل من أصل عربي ومصري يفوز بالأوسكار.
 


 

  • "بيبيون" رامي مالك
     

من أطرف لقطات الحفلة كمان هي محاولة الجميع مساعدة "رامي" على ضبط "البيبيون" بتاعته المايلة وكان منهم "ليدي جاجا" ولكن للأسف برضة مفيش فايدة وظهرت زي ماهي عايزة!
 

  • ليدي جاجا وبرادلي كوبر لايف على المسرح

كما هو متوقع فازت أغنية "Shallow" من فيلم “ A Star is Born” بالأوسكار لأفضل أغنية لفيلم وبرادلي كوبر وليدي جاجا غنوها سوا على مسرح لايف.
 


 

  • فريدي ميركيوري يفتتح الحفلة 

فرقة "Queen" قدمت ميكس لطيف جدا وقصير كعرض افتتاحي للحفلة لأجمل أغانيهم و"آدم لامبرت" كان المغني الرئيسي بدلاً من "فريدي ميركيوري" ولكن "فريدي" ظهر على شاشة المسرح الرئيسية بحجم ضخم تكريماً له وبشكل ترحابي للجمهور الحاضر للحفلة.
 



 

  • "ستان لي" يحضر الأوسكار

    وفي فقرة التأبين الشهيرة للأوسكار لصناع السينما والمؤثرين في الصناعة بكل مجالاتها تم تكريم زي كل سنة ناس كتير رحلوا عن عالمنا وكان أبرزهم السنة دي "ستان لي" الرجل وراء عالم مارفل وأبطاله من كوميكس وأفلام سينمائية.

     

  • قايمة الذهب 

أما عن باقي الجوايز ففازت Regina King بأحسن ممثلة مساعدة وMahershala Ali بأحسن ممثل مساعد و فيلم Green Book بأحسن سيناريو أصلي، وفاز فيلم BlacKkKlansman بأحسن سيناريو مقتبس وفيلم الكوميك والسوبرهيرو Black Panther بأحسن موسيقى تصويرية وأحسن تصميم إنتاج وأحسن تصميم ملابس.
 


 وفاز فيلم Spider-Man: Into the Spider-Verse بأحسن فيلم أنيميشن طويل وفيلم Roma لمخرجه ألفونسو كورون بأحسن فيلم أجنبي وفاز مخرجه بأحسن إخراج وفاز أيضاً بأحسن تصوير سينمائي وده يعتبر المرة الأولى إنه يفوز فيلم من إنتاج "نيتفليكس" بجوائز الأوسكار.

 


 وفاز فيلم Bohemian Rhapsody بأحسن مونتاج وأحسن مكساج صوت وأحسن مونتاج صوت وفيلم Vice بأحسن ميكب أب وهيرستايل، وفاز فيلم First Man بأحسن مؤثرات بصرية، وفاز فيلم Free Solo بأحسن فيلم وثائقي طويل وفيلم Period. End of Sentence. بأحسن فيلم وثائقي قصير، وفاز فيلم Skin بأحسن فيلم روائي قصيروفيلم Bao بأحسن فيلم أنيميشن قصير.
 

  • جوليا روبرتس تختم الليلة

    وختام الليلة كان بظهور مميز للممثلة الجميلة "جوليا روبرتس" بإعلان وتسليم جايزة أحسن فيلم واللي حصل عليها فيلم Green Book

     


 

  • إطلالات الريد كاربت 

وكعادة الأوسكار الريد كاربت فيها حدث أساسي لا يقل أهمية عن الحفلة نفسها ودايما بتبقى مليانة بإطلالات وأزياء مميزة أو مثيرة للجدل والسنة دي ما بخلتش علينا الريد كاربت بأي من الأتنين دول ودي كانت بعض صور منها.

 


 


 


 


 


 


 


 


 

Comments: