اعرف ازاي تقول لمديرك لا

25/02/2019

إنك تقول لا أو ترفض طلب حد دي حاجة صعبة، خصوصا بقى لو الشخص ده يبقى مديرك، وبالذات يعني لو إنت بتعمل كل اللي مديرك بيقولك عليه فهيبقي أصعب إنك تقوله في مرة لا، بس فيه أوقات ماينفعش تقول فيها "لا" واضحة وصريحة كده، بس ممكن تقول "لا" بالطريقة، موقع Wikihow قالنا الطريقة دي ازاي:

1- حضر ردك:

ممكن تكتب في "نوت" لنفسك مجموعة من الأسباب اللي تقولهاله ليه إنت مش هتقدر تعمل اللي طلبه منك ده، زي إنه بيديك شغل أزيد إو "تاسكس" أكتر إنت ماعندكش وقت كفاية ليها، فكر واكتب مجموعة من الأسباب اللي ترفض بيها الشغل ده، بهدوء وبشكل عقلاني فكر كويس في المشكلة ونظم ردودك لإن ده هيساعدك تقوله بالشكل المناسب.

فكر في الأسباب اللي هتقولهاله حتى لو كانت بسيطة زي إلتزامك مثلا اللي مش هتقدر تسهر بسببها في الشغل، أو مثلا لو شايف إن الـ"تاسك" ده مش من مهامك الوظيفية فكره بالوصف الوظيفي بتاعك.

2- حدد أولويات شغلك:

راجع جدول أعمالك وإدي لنفسك وقت في كل "تاسك" إنت وخده، ده ممكن ياخد منك وقت بس إنك تقول لمديرك "لا عشان ماعنديش وقت" دي هيخليه يستوجبك في مدى كفاءتك وفاعليتك، عشان كده لو كان الوقت هو مشكلتك فإنت المفروض تشرحله أولويات الـ"تاسكس" اللي معاك وإنك مسؤول تخلصها في ميعادها، وده هيكون أحسن لو عملت "فايل" وتستخدمه في كلامك مع مديرك.

3- حط نفسك مكان مديرك:

قبل ما تتكلم مع مديرك حط نفسك مكانه، وافهم أولوياته وأولويات الشركة، غالبا فهمك لدوافعه هيساعدك في صياغة ردك بطريقة أحسن، لإن ممكن لو ماعملتش إنت الـ"تاسك" ده هيكلف الشركة مصاريف أكتر، عشان كده المفروض تفكر في حجة مقتنعة وبديل يحمي الشركة من إنها تخسر.

4- حط في اعتبارك لغة الحوار اللي هتستخدمها:

مهم جدا وإنت بتقول لا حتى لو بالطريقة إنك تستخدم تون صوت وطريقة تعبير مناسبة في الكلام، من الأفضل إنك تستخدم لغة محايدة في كل الأوقات وبلاش تشخصن الأمور، بمعني إنك تفصل بين إنك بتحب أو بتكره مديرك عن الشغل وقت الكلام، وارجع في كلام للشركة والطريقة اللي هيتم الوصول بيها لأفضل نتيجة ممكنه.

من أمثلة الجمل المحايدة اللي ممكن تستخدمها "لو عملت التاسك ده مش هيكون عندي وقت اعمل فيه التقرير الأسبوعي" وبلاش تستخدم جمل زي "أنا مش هعمل ده لإنه كتير عليا"

5- اختار الوقت المناسب:

قبل ما تتكلم مع مديرك حدد الوقت المناسب، أكيد مش هيبقى أفضل حاجة لو اتكلمت معاه في وقت هو متوتر أو مشغول فيه، وطبعا قبل ما تفرض نفسك عليه بالكلام معاه فإنت محتاج تسأله السؤال الروتيني بتاع "عندك وقت نتكلم فيه شوية"، وعلى قد ما تقدر حاول تتكلم مع مديرك لوحدكوا.

6- خليك موجز في كلامك:

لما تتكلم مع مديرك اتكلم بشكل مباشر عن مشكلتك ومن غير لف ودوران كتير، لإنك لو مدخلتش في  الموضوع على طول مديرك هيحس إنك بتضيع وقته وهيفقد التعاطف معاك، واتأكد كمان إنك بتقول اللي إنت تقصده بشكل واضح وموجز.

وحاول ماتستخدمش كلمات سلبية كتير وإنت بتتكلم، فبدل ما تقوله مثلا "أنا عارف إنك قولتلي أعمل الشغل ده بس أنا معنديش وقت" جرب تقوله مثلا "أنا عندي فكرة تانية عن تقسيم عبء الشغل للمشروع ده"

7- ماتستناش كتير:

لو كنت عارف إنك مش هتقدر تعمل الـ"تاسك" ده، ماتخدش وقت طويل عشان تقوله ده، كل ما تقوله بدري كل ما هيكون أحسن، لإنك لو استنيت الموضوع هيبقى أصعب في إعادة توزيع الشغل.

8- رشح زميل ليك:

طريقة تانية بدل ما تقول لمديرك لا، هي إنك ترشح له زميل ليك في الشغل إنه يعمل الشغل الزيادة ده، وده هيوضح لمديرك على الأقل إنك فكرت في الشغل وفي الشركة مش إنك فكرت في نفسك بس وإنك خايف من المهام الزيادة في الشغل.

9- اقترح ترتيبات جديدة للشغل:

لو عندك شغل كتير هياخد منك وقت أطول من ساعات العمل، أو لو مشوارك طويل مثلا من البيت للشغل، فممكن تقترح على مديرك إنك تخلص الشغل ده البيت حتى لو يوم واحد في الأسبوع لو الشغل بتاعك بيسمح بده  

Comments: