استشارية نفسية بتوضح ازاى تتعامل مع الأزمات

28/02/2019

كتب - رحاب سعدي 

استضافت المذيعة مريم أمين في برنامجها اتفقنا على نجوم إف إم  الاستشارية النفسية منى رضا للكلام عن الخروج من الأزمة النفسية اللى عاني منها كتير من الناس بعد حادثة اصطدام قطار قطر مصر أمس.

وكان ملخص الحلقة كالآتي

- الناس اللى كانت في مكان الحادث أو ليها حد قريب منها كان موجود في وقت الحادثة بالتأكيد الموضوع هيكون مأثر عليه.

- ممكن يكون الحادث مأثرش على ناس موجودة في نطاق الحدث ولكن نفسيتهم اتاثرت من خلال التفاعل مع الحادثة أو لمجرد إنهم شافوا مشاهد الحريق.

- لو بعد الحادثة اتغيرت وده أثر على الانتاجية بتاعتك وخلاك مش قادر تعمل أي حاجة ده معناه أنه حصل تفاعل بينك وبين الحادثة نفسها.

- لو تفاعلت مع الحادثة وأثرت فيك ضروري تزور مختص نفسي عشان يقدر يساعدك وتطلع من الحالة دي وترجع لطبيعتك.

- ممكن أم ابنها كان في محيط الحادثة تجلها حالة من الخوف الشديد أو الفزع وده يتطلب تدخل استشاري نفسي ضروري.

- طالما بتعمل مجهود كبير بمعاناة عشان تستمر في حياتك بشكل طبيعي ده معناه إن الحادثة أثرت عليك بشكل كبير.

- من النصائح الضرورية للتعامل مع أي حادثة هو أولًا منع الأطفال من مشاهدة أي حاجة ليها علاقة بالحادثة

- ضروري منع الأطفال من مشاهدة المحتوى ده إنه مش بيكون مدرك الموضوع لكن بيحس مشاعر ناحيته وده خطر جدًا.

- أما الكبار نفسهم النصيحة النفسية اللي أشارت ليها "منى رضا" هو إنهم ميجروش ورا الحدث ويعيشوا في كل تفاصيله لإن ده يؤثر بشكل مباشر على نفسيتهم.

- كمان ضروري تقنين عملية البحث وراء الحادث يعني كل 3 ساعات يشوف إيه الجديد ولكن مش هيعيش الوقت كله في الحدث لأنه هياثر على نفسيته جدًا.

وده كان ملخص مقابلة الدكتور منى رضا على نجوم إف إم للكلام عن إزاي تتعامل صح مع الأزمات.

Comments: