١٠حقايق أساسية عن الأحلام: ممكن تتحكم في أحلامك

01/03/2019

نظريات كتير اختلفت في فهم وتفسير الأحلام وانقسمت الناس عليها إن ليها أبعاد نفسية وناس قالوا إنها ليها تفسير واقعي أو بتدل على حاجات هتحصل، الأحلام عموما فكرة غريبة ومثيرة ومرعبة بالرغم إن مافيش إجماع واحد على سبب الحلم، بس فيه 10 حقايق متفقين عليهم في الأحلام:

1- كل الناس بتحلم:

الكبار والصغيرين بيحلموا تقريبا في حدود ساعتين في اليوم، حتى الناس اللي بتقول إنها مابتحلمش فهما فعلا بيحلموا، الأبحاث أثبتت إن الشخص بيحلم أكتر من حلم في اليوم، الحلم الواحد ممكن مدته تبقى من 5 لـ 10 دقايق، يعني بالحسابات كده في متوسط عمر الفرد العادي فإن الشخص ممكن يبقى بيحلم حوالي 6 سنين.

2- الشخص بينسى أغلب أحلامه:

نسبة 95% من الأحلام غالبا الشخص بينساها، وده وفقا للنظريات اللي بتتكلم عن نسيان الأحلام، فالنسيان ده بيكون بسبب التغيرات اللي بتحصل في دماغ الشخص أثناء النوم اللي مابتدعمش معالجة وتخزين المعلومات اللي بيسببوا التذكرة، لإن فحوصات الدماغ للأشخاص النايمين أظهرت إن الفصوص الأمامية وهي المنطقة اللي بتلعب دور رئيسي في تكوين الذاكرة بتكون غير نشطة وقت النوم أو بالأخص في الوقت اللي بتكون فيه حركة العين سريعة وده وقت الحلم أصلا.

3- مش كل الأحلام بالألوان:

في حين إن أغلب الناس بتقول إنها بتحلم بالألوان فيه نسبة صغيرة من الناس بتقول إن كل أحلامها بالأبيض والأسود بس، الدراسات طلبت من الأشخاص اللي حلموا إنهم يختاروا الألوان اللي كانت في الحلم أغلب الناس اختارت ألوان من بستيلة الألوان الناعمة.

4- الستات والرجالة بيحلموا أحلام مختلفة:

الأبحاث لقت اختلاف بين المحتوى اللي ممكن يحلم بيه الراجل عن الست، أغلب الرجالة قالوا إن أحلامهم فيها سلاح وأغلب الستات قالوا إن أحلامهم فيها هدوم، دراسة تانية أثبتت إن أغلب الرجالة لو ماحلموش أحلام فيها عنف هتكون نشاط جسدي، في حين إن الستات ممكن أحلامهم يكون فيها رفض واستبعاد ومحادثات أكتر.

بتميل أحلام الستات إنها بتبقى أطول وبيكون فيها شخصيات أكتر، ولو هنتكلم عن الشخصيات فالرجالة بيميلوا إنهم يحلموا برجالة تانيين في حين إن الستات بتميل إنها الشخصيات في أحلامها يكون فيها الجنسين بالتساوي.

5- احتمال الحيوانات يبقوا بيحلموا:

ناس كتير بتعتقد إن لما بيكون فيه كلب نايم وبيحرك ديله أو رجله فإن هو كده بيحلم، في حين إنه من الصعب إننا نقول إن الكلام ده بيحصل فعلا، فبعض الناس بتعتقد إن الحيوانات فعلا بتحلم زي البشر عادي بما إنهم بيمروا بمراحل النوم اللي البشر بيمروا بيها.

6- ممكن تتحكم في أحلامك:

الحلم المفهوم هو الحلم اللي إنت بتدرك إنك بتحلم بيه في حين إنك نايم فعلا، يُعتقد إن الحلم الواضح هو عبارة عن حالة مختلطة بين الوعي والنوم وحركة العين السريعة، في الأحلام دي ساعات إنت بتبقى مدرك مسار الحلم وبتتحكم فيه وفي أفكارك.

ما يقرب من نص العالم ممكن يفتكر ولو تجربة واحدة بس من الأحلام اللي زي دي، وفي أشخاص أحلامهم كلها من النوع ده.

7- المشاعر السلبية منتشرة أكتر:

من أكتر من 40 سنة جمعت باحثة اسمها "Calvin S. Hall" من طلابها في الجامعة أكتر من 5000 حلم، الأبحاث دي كشفت إن أكتر الأحلام بيكون فيها مشاعر قلق وعواطف سلبية بشكل عام أكتر من المشاعر الإيجابية.

8- الأشخاص الكفيفة ممكن يحلموا بالصور:

واحدة من الدراسات قالت إن الأشخاص اللي بتولدوا مكفوفين ممكن يحلموا بصور، وممكن يكون عندهم مرحلة حركة العين السريعة المرتبطة بالحلم البصري، بالرغم من إن حركة العين كانت أبطء شوية بالمقارنة بالمشاركين التانيين في الدراسة، بس المشاركين المكفوفين بلغوا عن أحاسيس الأحلام نفسها بما فيها الجزء المرئي.

9- الشخص بيكون مشلول في أحلامه:

بتتميز مرحلة النوم اللي فيها حركة العين سريعة بشلل عضلات وده لإن الخلايا العصبية الحركية مابتكونش نشطة وبالتالي جسمك مابيتحركش، وفي بعض الحالات بينتقل الشلل ده لحالات اليقظة بيستمر لمدة 10 دقايق واسمه شلل النوم، بالرغم إن التجربة دي بتبقى مخيفة بس الدكاترة والأبحاث بيقولوا إنها طبيعية، ولازم تستني شوية قبل ما تحرك عضلاتك تاني.

10- فيه أحلام كتير عالمية:

في حين إن الأحلام غالبا ما بتتأثر بتجاربنا الشخصية، بس الدراسات لقيت إن فيه أحلام منتشرة جدا بين الناس في العالم كله برغم اختلاف الثقافات، مثلا زي إن كلنا عدى علينا الأحلام بتاعت المطاردات، والهجوم، والتوهان، والوقوع من فوق أماكن عالية وأحلام التجمد او الشلل وقت النوم وفقد القدرة على الحركة، وأحلام الوصول متأخر مثلا.

Comments: