التلقيح فن: إزاي توصل الرسالة من غير ما تبقى غشيم؟

04/03/2019

بالرغم إننا متفقين إن التلقيح بالكلام هو أسوأ طريقة توصل بيها رسالة للشخص اللي إنت متضايق منه أو في خلاف معاه، بس في نفس الوقت هي أحسن طريقة توصل بيها للناس اللي عايز تقوله من غير ما تلبس في غلط ويمكن دي أحسن مميزاته مع إنه أسلوب رخيص.

الأسلوب ده منتشر عند المصريين من زمان بطرق مختلفة زي إنهم يقولوا نكت أو يستخدموا السخرية من مواقف مضايقاهم فعلا، أو زي مثلا الستات اللي كانوا بيتكلموا على بعض من البلكونات عشان يسمعوا بعض بس مايقلوش اسم اللي بيلقحوا عليها، وطبعا السوشيال الميديا بقت وسيلة هايلة للتلقيح، سواء بين الصحاب وبعضهم أو بين الزملا في الشغل، أو بين أي حد والإكس وبتاعه/ بتاعته، فلو قررت تستخدم الأسلوب ده، يبقى لازم تعرف إن للتقليح أصول:

1- أول حاجة بتعملها بالرغم إنها قدمت بتكتب هاشتاج في آخر البوست أو التويت #مقصودة .. #موجهة

2- خليك متأكد إن الكلام هيوصل سواء عن طريق "فيس بوك" نفسه، أو إن حد بعينه إنت عارف ومتأكد إنه هياخد سكرين شوت مثلا ويوصلها

3- الكلام اللي إنت كاتبه مابيحتملش معنى إنه يبقى على شخص تاني غير اللي هتقلح عليه، ولازم هو يبقى عارف ده، وده بيتطلب إنك تذكر في التلقيحة تفصيلة معينة هيلقطها الشخص "الملقح عليه"

4- أو ممكن تستخدم طريقة أحسن عشان الكلام يوصل هو إنك تحط الكلام في ستوري على فيسبوك أو واتساب أو إنستجرام عشان تشوف إذا كان شافها ولا لا

5- وفيه طريقة أروش برضه وهي إنك تكتب البوست وتخليه Custom للشخص ده بس، ودي بقي طريقة هتزاوله عشان هيبقى بيسأل الناس اللي حواليه حد شاف اللي اتكتب فهيقوله لا

6- اكتب في التلقيحة كلمة متعودين تقولوها سوا، أو كلمة الشخص ده متعود يقولها

7- دور على "بوستس" ناس كتباها أو "سكرينشوتس" واعملها شير واكتب فوقها هاشتاجز كتير زي "ربنا شايف".. "ربنا يتوب علينا من الناس دي"

8- لو هتلقح على حد في الشغل بلاش مديرك

9- اتفق مع حد من صحابك يرد على التلقيحة بكلام زي "حاجة تقرف".. "مش عارف الناس دي عايشة إزاي"، عشان تدخل إنت تكمل زيطة معاه/ معاها

Comments: