ليه ماينفعش تعمل دايت في مصر؟

04/03/2019

كتب - رحاب سعدي 

لو بقالك فترة بتحاول تعمل دايت ومش عارف، إحنا حابين نقولك إن العيب مش فيك، العيب إننا عايشين في مصر، دي أسباب بتأكد إن العيشة في مصر بتفسد أي محاولة للدايت


المحشي هي الأكلة اللي كل الشعب بيحبها، ودي أكبر أعداء الدايت

الأكلات المصرية الأصيلة اللي مابنقدرش نقاومها أغلبها نشويات أو دهون وبتتخن، زي الكشري.. الطبيخ أبوسمنة  رز.. الملوخية بالعيش.. الفتة واللحمة

أسياخ الشاورما انتشرت الفترة الأخيرة في البلد بطريقة مخيفة، ومحلات السندوتشات السوري، يعني ليه إحنا؟ إشمعنى مصر اللي السوريين عاوزين يأكلوا شعبها.. اللي بيحصل ده حرام!

كل مناسباتنا مرتبطة بالأكل، شم النسيم بتاع فسيخ، والولادة حلبة ومغات، والأفراح محشي وفراخ مشوية، الأعياد كحك وبسكويت وفتة ولحمة، مولد النبي حلاوة المولد، رمضان عزومات طول الشهر

خلينا نتفق إن الجيم/ الرياضة من أهم عنصر من عناصر الدايت ونتفق برضه إننا مش بتوع جيم ولا رياضة

المشي هو أبسط رياضة بتساعد على حرق الدهون وتنشيط الدورة الدموية، تخيل/ تخيلي لو لبست تريننج ونزلت تجري في الشارع الساعة 2 الضهر هيحصل لك إيه

الدايت مكلف، اشتراك في جيم، أدوية تساعدك إنك تخس، ده بجانب إن محلات الأكل بتطور نفسها وبتروج لأكلها بصور تجري الريق، مليانة جبن سايحة ولحمة دايبة وبطاطس بتلمع

إحنا بناكل عشان بنلاقي سعادتنا، فتخيل أنت بتنزل كل يوم تتعامل مع ناس في الشارع والمواصلات والشغل وكمان عامل دايت ومش بتاكل.. طب ينفع كده؟

إحنا أكلنا كله فيه إما عيش أو رز أو مكرونة، دايت إيه بقى اللي تعمله؟

كل حد فينا عنده صاحب بياكل ومش بيتخن أو بيحارب النحافة، هتخسره بسبب دايت يعني؟

Comments: