٨ ملاحظات على التريلر الرسمي للموسم الأخير من جيم أوف ثرونز

05/03/2019


النهاردة نزل التريلر الأول للموسم التامن والأخير من "جيم أوف ثرونز" واللي في ساعتين فقط من نزوله تخطت مشاهدته الـ 7 مليون مشاهدة على الفيسبوك، وكان مليان كالعادة بلقطات ذكية تشويقية العالم كله هيقعد يحللها من النهاردة ولحد يوم عرض الحلقة الأولى من الموسم يوم 14 أبريل 2019 ودي كانت ملاحظتنا على 8 لقطات من التريلر وهي:

1-"أريا ستارك" لأول مرة من الموسم السادس ترجعلها نظرتها الطفولية تاني والبراءة في عينيها بعد ما كانت قالبة وشها علينا في الموسم السابع وعاملة فيها شبح الحتة، بس على الله يا جورج يا مارتن تقتلها قبل ما تخلص "الليستة" بتاعتها!


2- "سانسا" بتثبت للمرة التامنة إنها "مي عز الدين" المسلسل، أول مرة تشوف في حياتها تنانين وعمالين يطيروا حوليها وهي بتدي "أبرد" رد فعل في الدنيا، نجيب لك إيه يبهرك أكتر من تنين بيطلع نار طيب؟!

3- المشهد ده طبعا "جون سنو" في قبو وينترفيل الشهير وبيزور قبر أمه وخاله ومش عارف هيقول إيه بعد اللي حصل مع "عمته" دينيرس على المركب، الله يرحمك يا عم "نيد" معرفتش تربي!

4- الحمد لله "جورا مورمنت" باين إنه خرج من الفريندزون وراح الحرب وهيقود اللي باقي من السبعين نفر اللي باقيين من هاوس مورمنت.

5- سيرسي شكلها وحيد ويصعب على الكافر، بس نقول إيه؟! إنتي اللي عملتي كدة في نفسك يابنتي، درينك بقى.

6- طبعا كل اللي شاف اللقطة دي فهم ده إيه، شكل ابننا "فخر وينترفيل" جون سنو هيركب التنين التاني مع دينيرس وهيعملوا أحلى شغل، بس ده عادي جدا مايكونش قصدهم بالمشهد ويكونوا بيشتغلونا عادي زي كل تريلر بينزل.


7- "جيمي لانستر" جميل ويارب يعيش لأخر المسلسل معندناش أي ملاحظة تانية هنا، جيمي قلبي يارب.

8- كما قال كتكوت بعد ماشوفنا اللقطة دي "جلبي هيوووجف... جلبي هيووووجففففف" من الحماس والانتظار.

Comments: