‎ملخص زيارة دكتور السنان: خوف وشلل جزئي وفلوس كتير

06/03/2019

زيارة دكتور السنان هي فكرة مخيفة عند أغلبنا من بداية التفكير في الموضوع لحد ما بنوصل العيادة ونسمع صوت أدوات الدكتور وريحة البنج اللي بتكون "فايحة" في المكان كله، وعلشان المعاناة دي بتكون عامة عند أغلب الناس، حبينا نجمع ملخص زيارة دكتور السنان في موضوع وكان كالآتي:

‎- البنج
‎طبعًا ريحة البنج اللي بتفضل في هدومك ومجرد ما دخلت أي مكان خلاص كدة بقى معروف إنت كنت فين وبتعمل إيه، وأول جملة بتسمعها ريحتك بنج إنت كنت عند دكتور السنان؟ ‎

- الخوف!
‎الزيارة دي بتكون برعاية الخوف، فكرة إنك رايح لدكتور السنان دي فكرة مرعبة، وبيزيد خوفك لما بتستنى دورك فتسمع تعذيب الدكتور لزمايلك من المرضى! ‎

- حقنة البنج
‎طبعًا لو خلاص الدكتور قرر إنه يخلع لك درسك ساعتها بتواجه حقنة البنج الكبيرة جدًا، ولو طلعت من المدخنين هتاخد بتاع خمس أو ست حقن كدة تحسه بيعقابك إنك بتشرب سجاير، وبعدها بتحس بشلل جزئي في بوقك بس.

‎- أدوات دكتور السنان
‎أغلب الأدوات اللى بيستخدمها دكتورالسنان بتكون شبه أدوات الجزار والنجار والسباك، تحسه واخد توليفة كدة منهم، مثلًا في أداة بيستخدمها عاملة زي منشار بس ده الحجم الصغير منه، وفيه رشاش ماية كدة تحسه خرطوم مايه مصغر برضه.

‎- مرحلة الأشعة
‎بعد ما بتعيش كل مراحل الرعب في الدخول لدكتور السنان وبعد الكشف بيقولك محتاجين نعمل أشعة، هي براءة بس براءة مؤقتة عشان هترجعله تاني بالأشعة، ويا ويلك لو طلع ضرس العقل معووج ومحتاج يتخلع! ‎

- ضرس العقل
‎وجع ضرس العقل مش في خلعه ولا في الوجع اللي بيسببه لكل واحد فينا لأ إطلاقًا.. وجعه الحقيقي لما تخلعه ومفعول حقنة البنج يروح تمامًا، قابل يا عم!

- الفلوس
وإنت خارج من عند دكتور السنان لازم تدفع اللي وراك واللي قدامك حتى لو الشغلانة كانت بسيطة.

- الجبس 
فيه مرحلة من مراحل دكتورالسنان بيحط جوه بقنا حاجة زي الجبس كدة علشان ياخد شكل الضرس بالظبط عشان يعمل طربوش.

- حشو العصب 
حشو العصب ده أكتر مرحلة مخيفة فيه لما الدكتور يفضل ينخور وينخور وينخور علشان يموت العصب.

Comments: