رافض تدخلات أهلك في حياتك؟.. اعرف الفرق بين الاستقلال والاستغناء عنهم

06/03/2019

كتب - رحاب سعدي 

مجرد ما نكبر بتتغير أفكارنا وبنبدأ نكتشف نفسنا أكتر وتتكون معاها شخصيتنا، دي مرحلة النضج اللي بنحتاج فيها نحس بالاستقلال سواء المادي أو العاطفي، يعني تشتغل وتدبر أمور حياتك وكمان تكون مسؤول عن القرارات اللي هتاخدها.

الفترة دي زي ما بيكون فيها نضج ورغبة في الاستقلال كمان بيكون فيها مشاكل كتيرة مع الأهل اللي بيسعوا إنهم يوفروا عامل الأمان ليك اللي بيكونوا لسه شايفينك طفل صغير، لكن في المقابل إنت بتقاوم الفكرة دي وبتدور على مساحة من الخصوصية لحياتك، ودي نقطة مهمة نبدأ بيها موضوعنا هو إننا نعرف إزاى نستقل ونتحمل مسؤولية حياتنا كاملة وفي نفس الوقت ميحصلش استغناء عن الأهل أو الآخرين ويكون ليهم دور واضح في حياتنا في مرحلة النضج.

"مهم إنك تكون مستقل، حاسس بوجودك، وبقيمتك، وبكيانك، بس ده مش معناه إن وجودك يبقى زى الزرعة الشيطاني، اللي طالعة في صحراء جرداء، مش معناه إنك تستغنى عن وجود الآخرين في حياتك، ده كان جزء من مقالة  بعنوان الاستقلال والاستغناء اللي دونها الطبيب النفسي محمد طه.

المقالة دي شرح فيها إزاى أي شخص يقدر يحقق الاستقلال في حياته من غير ما يستغنى عن أهله أو عن الناس في حياته بشكل عام، ودة من خلال إنك تقدر تحط حدود بينك وبين الناس عشان ماتتعرضش لإيذاء نفسي منهم وفي نفس الوقت تقدر تنسجم مع الناس وتكون بينك وبينهم علاقة يعني ماتبقاش عايش في عزلة بسبب الحدود دي.


كمان شرح محمد طه الفرق بين الاستقلال والاستغناء بإن الاستقلال هو حقك يكون ليك رأي مختلف عن أهلك ولكن مش من حقك تستغنى عنهم وتفقد الأمل فيهم، أو إنك تبطل تسألهم عن رأيهم، وتعتبر وجودهم زي عدمه، وكمان اعتبر "طه" إن من حق البنت إنها تشتغل وتكون ليها ميزانية خاصة حتى لو متجوزة ولكن متستغناش عن وجود زوجها ودوره في حياتها، ويكون ليه وقت في يومها.

وكمل الدكتور في المقالة وقال إنه من حق كل شخص يحس بنفسه وبأهميته وبنجاحه في الشغل وحياته بصفة عامة ولكن ده مش معناه إنه يبعد عن كل الناس ويدمر العلاقات اللى في حياته لإن الإنسان بيكون جواه احتياجات نفسية بتربطه بالآخرين، سواء احتياجات من الأ أوالأب أوالزوج أوالزوجة فمينفعش نعيش في قوقعة لوحدنا.

طيب إزاي أحقق الاستقلال في حياتي وأنا عايش مع أهلي؟ دة سؤال مهم والإجابة عليه نشرها   الموقع الشهير WikiHow في مقالة بعنوان"كيف تكون مستقل في حين تعيش في منزل الوالدين".

المقالة شرحت خطوات تقدر تساعدك على الاستقلال في حياتك حتى لو كنت عايش مع أهلك، وكان من ضمن النصايح، هو التواصل، مهم جدًا يكون بينك وبين أهلك تواصل ولغة حوار تقدر تعبر بها عن احتياجاتك زي إنك محتاج خصوصية ومساحة من التنفيس، من الخطوات المهمة كمان اللى اتكلم عنها الموقع هو إنك تسمح لأهلك يعرفوا خططك تقولهم مثلا بتعمل إيه وهتخرج فين وهكذا.

كمان مهم إنه يكون ليك مساحة خاصة بيك تقدر تفكر فيها وتفضي دماغك أو تعمل أي شيء محتاجه، المساحة دي زي مكتب ليك أو غرفتك أو جزء من غرفتك، ومهم تعرف أهلك إنك محتاج تحس بالخصوصية  في المكان ده لوحدك، وعامة من المهم تقضي وقت لوحدك ودة هيساعدك تحس بالحرية والراحة.

من الخطوات اللي هتساعدك على تحقيق الاستقلال في بيت أهلك هو إنك تشارك في مصاريف البيت، تقدر تتناقش معاهم وتحط في خطة ميزانيتك جزء خاص بالمساهمة في البيت، دة غير المساعدة في مهام البيت، كمان احترام البيت وممتلكات الأهل فيه نقطة مهمة جدًا لازم تاخد بالك منها.

كل دة بدوره بيقوي علاقتك بأهلك في سن النضج اللى بتحتاج فيه إنك تحس بالاستقلال، ولكن مش هيمنعك إنك تحط خطط وتاخد قرارات في حياتك ومتكونش معتمد عليهم بشكل كامل.

من ضمن المقالات المهمة اللى اتكتبت في الموضوع ده كانت مقالة بعنوان "كيف تكون مستقل عن أهلك" واللي دونتها صحفية اسمها شانون فيلوب، بمساعدة من براشيل توماساني، أخصائية الزواج الأسرة في تدوين وتقديم  بعض النصايح المهمة، وكانت من أهم النصائح لتحقيق الاستقلال هو تحقيق الاستقلال المادي، ودي تعتبر أول خطوة هتحسسك بالتحرر، وتبدأ بإنه يكون ليك حساب في البنك وتنظم أمورك المادية.

كمان نصحت توماساني باتخاذ قرارات مهمة في حياتك من غير ما ترجع للأهل رغم إن آرائهم بتكون مذهلة ولكن مش هتساعدك لو كان فيه بينك وبينهم مشاكل بسبب إنك كبرت، وشددت على إن القرارات دي تبدأ بحاجات بسيطة وبعدين تتدرج لقرارات مهمة عشان تزيد ثقتك في نفسك.

كمان من النصايح المكررة في الموضوع واللي أكد عليها أغلبية المتخصصين هو المناقشة والكلام مع الأهل، يعني تتكلم مع أهلك عن احتياجاتك للاستقلال  وتكون احتياجات مش هتضر بالأهل، زي إنك تبدأ الكلام بتقدريك ليهم ودورهم في حياتك.
ممكن تكون فكرة وضع حدود بينك وبين أهلك دي فكرة غريبة، لكن الدكتور جون دوفي متخصص في علم النفس ومؤلف كتاب "الآباء المتوفرين" أكد على أنه ضروري الحدود بين أهلك تكون واضحة في المرحلة دي وده مش هيأثر على حب ليهم بس في السن ده إنت بتتغير وعلاقتك بيه كمان بتتغير.

 

Comments: