متحف آثار فرعونية في برشلونة: التذكرة بـ 12 يورو ومجانا للمصريين

07/03/2019

في تويتة وقفنا قدامها شوية، كان مضمونها إنه فيه متحف مصري في برشلونة سعر التيكت بتاعته 12 يورو، لغاية دلوقتي مفيش حاجة غريبة، بس لما المصريين يدخلوا المتحف ده بشكل مجاني، كان لازم نكلم اللي كتب التويتة دي ونعرف منه تفاصيل الموضوع.

صاحب التويتة اللى انتشرت كان اسمه أحمد قاسم، عنده 33 سنة، وهو في البداية  كلمنا عن المتحف نفسه، وإنه مكانش مرتب لزيارة المتحف، ولكنه لما زاره لقاه مبنى مستقل بيعرض الآثار المصرية ولكنه متحف كبير جزء منه بيتعرض فيه اللي يخص الفراعنة، المكان اللي بيتعرض فيه آثار الفراعنة كان عبارة عن 3 أدوار أو أكتر، القطع اللي قد تكون أصلية وده كان نابع من خبرته كطالب فنون سابق.

والفخر الحقيقي اللى حس بيه أحمد في طريقة عرض الآثار نفسها كأنها الأهم في التاريخ، من حيث الرقي في عرضها  والاهتمام بالقطع، ده غير إنه كان فيه جناح كامل لتوت عنخ أمون، وبسبب صغر حجم المتحف ممكن يتلخص في إنه معرض مش متحف.

كمان علق قاسم على موضوع إن تذكرة المتحف مجانية للمصريين عكس حال المتاحف المصرية في حال زيارة المصريين ليها، وقال إنه هيكون صعب لإن المتاحف بتحتاج لمصاريف وصيانة وغيره من التكاليف لكن ده مش هيمنع إنه  لازم تكون في مبادرة لتقديم فرص عروض على أسعار التذاكر للمصريين في المتاحف الموجودة في مصر، و دة مش عشان زيادة الحس الوطني ولكن باعتبار الآثار تاريخ إنساني وبالتالي المصريين جزء منه فمش منطقي نكون مصريين و أغراب عن التاريخ - على حد وصف قاسم -.

ولما سألنا أحمد عن الفترة الزمنية اللى بترجع ليها الآثار قال إنه مقدرش يقرا تفاصيل المعروضات كلها بس هو رجح إنها تكون لأسر فرعونية متأخرة، وأهم الآثار اللي شافها في المعرض كانت قطع من مقبرة توت عنخ آمون.

سألناه عن رأيه في الآثار إذا كانت مسروقة ولا لأ قال إن الآثار دي مصرية ومادام خرجت بره أرض مصر تبقى مسروقة سواء كان السارق الاحتلال ولا تجار الآثار أو حتى الحكومة اللي أهدتها و باعتها، وتفسيره لده إن الآثار دي مش ملك حد عشان يهادي أو يبيع منها، ده لإنه زيها زي أرض مصر بالظبط.

أما عن الإقبال داخل المتحف قال أنه مكانش كبير والجنسيات كانت ما بين الأسبان والروس والألمان.

ودي صور لبعض معروضات المتحف:
 

Comments: