أسخف 30 فزورة عدوا على تاريخ البشرية

11/03/2019

عشان إحنا في الأساس شعب ابن نكتة، ماوقفناش عند تكوين النكت التقليدية زي مرة واحد كذا كذا وهيخهيخهيو في الآخر، طورنا من شكل النكت لفوازير سخيفة، بدل ما بنقول النكتة في شكل جملة خبرية بنحاول نتعب اللي قدامنا شوية ونخليه يفكر عشان نسخف عليه أكتر يعني.

عشان تسخف على اللي قدامك وتضحكه في نفس الوقت من غير تفكير كتير جمعنالك أكتر 30 فزورة سخيفة معروفة عشان نفكرك بيهم ونساعدك على السخافة:

1- لو واحد صيني طلع القمر إيه اللي هيحصل؟

الصينين هيقلوا واحد

2- حاجة بيضا طايرة في السما؟

دبانة راحة تحج

3- مرة واحد راح يشتري ساعة لقاها غاليه تفتكر عمل إيه؟

اشترى خمس دقايق

4- مرة واحد طويل شرب لبن مات ليه؟

لإن اللبن صلاحيته انتهت عقبال ما نزل بطنه

5- ليه الخشب يتيم؟

عشان مقطوع من شجرة

6- ليه التعبان بيحط عدسات لاصقة؟

عشان ماعندوش ودان يسند عليها النضارة

7- ليه النكته ماشية بتعيط؟

عشان فيه واحد ضحك عليها

8- نقطة سودا على الحيطة تبقى إيه؟

دبانة

9- نقطتين سود على الحيطة يبقوا إٍيه؟

فيشة

10- مرة 1 2 3 دخلوا الحمام طلعوا الحمام 3 2 1 ليه؟

عشان دخول الحمام مش زي خروجة

11- ليه السمك بيخاف من الجنيه؟

عشان الجنيه فيه 100 قرش

12- ايه الفرق بين امريكا والفلاشة؟

امريكا USA لكن الفلاشة USB

13- بيضة وقعت وماتكسرتش ليه؟

عشان مدهونة بمعجون سنان سيجنال تو

14- حاجة سودا ماشية فى الصحرا ايه هي؟

سرب نمل رايح يعزي

15- ليه الكدب بيركب مواصلات؟

عشان مالوش رجلين

16- ليه القطنة مش هتدخل النار؟

عشان مدام نظيفة قالت القطنة مابتكدبش

17- ليه الكيبورد هتدخل الجنة؟

عشان فيها زرار تاب

18- ليه الكيبورد مابتنامش؟

عشان فيها شفتين

19- ليه القطر مهم؟

عشان تحته خطين

20- ليه سندوتشات البرجر بتجري؟

عشان وجبات سريعة

21- ليه اليابان معندهاش حنان؟

عشان في قارة آسيا

22- ليه القرد سريع؟

عشان في عين أمه غزال

23- إيه الفرق بين البطة والوزة؟

1- تقدر تحلق شعرك زلبطة لكن ماتقدرش تحلقة زلوزة

2- فية رحالة اسمة ابن بطوطة لكن مافيش رحالة اسمة ابن وزوزة

3- تقدر تبلبط في البحر لكن ماتقدرش تبلوز فية

4- كلنا بنتغطى في الشتاء ببطانية لكن مابنتغطاش بوزانية

5- الوزة كانت زمان بطة لكن الشيطان وزها

24- ليه الكلب بيهوهو؟

عشان القطة بتنونو

25- ليه النمر بيجري ورا العربية؟

عشان يشوف النمرة

26- ليه المصريين بيشربوا الشاي؟

عشان مابيتاكلش

27- بنعمل إيه قبل ما نخرج من البيت؟

بنكون جوا البيت

28- إيه الفرق بين المزرعة والبطاطس؟

المزرعة فارم والبطاطس فارم فريتس

29- إيه الفرق بين نانسي عجرم وعمرو دياب؟

إليسا بتعمل شريط كاست

عمرو دياب بيعمل شريط كراجل

30- ليه القطة حيوان تعيس؟

عشان دايما تخربش وماتكسبش

Comments: