٣٠ سنة إنترنت.. اعرف التاريخ التفصيلي لأهم شبكة في العالم

14/03/2019

بما إننا وصلنا لـ 2019 فالمكان الأساسي في حياتنا هو العالم الافتراضي مش الواقع اللي عايشين فيه، وبكده يبقى عدى 30 سنة على دخول العالم الافتراضي حياتنا أو بالتحديد ما يسمى بالـ World Wide Web اللي اختصارها متعارف عليه "WWW".

بداية ظهور الإنترنت كان في الستينات في وحدات الجيش الأمريكي وكان بيتسمى "أربانت" أو "ARPA" وكانت بدائي جدا في الأول لإنهم كانوا بيستخدموه في نقل البيانات بين أجهزة الكومبيوتر في ده، بعد كده اتطور في السبعينيات لشبكة اسمها "NSF" ومنها بقى فيه تطورات في عالم الاتصالات أدت لشبكات أكبر وأعقد.

بعد كده ظهرت شركة مايكروسوفت في التمانينات ومنها أطلقت الشركة "ويندوز" ومنها دخل الإنترنت في مرحلة جديدة متطورة أكتر، وبعد كده ظهر عصر صفحات الإنترنت اللي اتطورت من "ويب 1" لـ "ويب 2" لـ "ويب 3".

الرحلة دي من الأسباب اللي بتخليك تقرأ الموضوع ده دلوقتي، الرحلة دي كان فيها محطات مؤثرة أكتر من كده وهما:

1958: شركة "بل" اخترعت أول مودم بيسمح بنقل البيانات الرقمية عن طريق خط التليفون

1961: نشر ليونارد كلينروك من معهد ماساتشوستس للتقنية أول بحث عن نظرية تحويل الطرود لنقل البيانات

1962: واحدة من وكالات وزارة الدفاع الأمريكية بدأت في أبحاثها عشان تعمل شبكة  "أربانت".

1964:  ليونارد كلينروك نشر كتاب عن استعمال وتحويل الطرود في إنشاء شبكة

1967: أول مؤتمر عن إنشاء شبكة "أربانت"

1969: ربط أول 4 كومبيوترات من جامعات أمريكية ببعض وفقا لواجهة معالجة الرسائل لصاحبها ليونارد كلينروك.

1971: 23 كومبيوتر اتربطوا ببعض بشبكة  "أربانت"، وتم إرسال أول إيميل.

1972: ظهر أول تنظيم دوره هو إدراة الإنترنت.

1979: ظهر أول منتدي، وكان اسمه (News Groups)، وهو كان منتدى نقاش بين طلبة أمريكيين

1982: اتعرف  برتوكول TCP/IP وظهرت كلمة "إنترنت"

1983: ظهر أول خادم نطاقات (DNS)

1984: بقى فيه ألف كمبيوتر مرتبط بالشبكة

1987: بقى 10 آلاف كمبيوتر مرتبط بالشبكة

1989:  100 ألف كمبيوتر مرتبط بالشبكة (البداية الحقيقية لانتشار الإنترنت)

1990: اختفت شبكة "أربانت"

1991: أعلنوا للجمهور عن " World Wide Web"، وبدأ ظهور لغة كتابة لصفحات الإنترنت (HTML)

1992: مليون كمبيوتر مرتبط بالشبكة

1993: ظهر متصفح الويب NCSA Mosaic

1996: 10 مليون كمبيوتر مرتبط بالشبكة

2000: انتشرت الإنترنت على مستوى العالم

بعد سنة 2000 بقت البنية التحتية للإنترنت شبه ثابتة، وبقى التطور واضح على مستوى البرمجيات والخدمات اللي بتقدمها شبكات الإنترنت، ومنها اتطورت شبكات الإنترنت لصفحات ديناميكية بتعتمد على لغة البرمجة، اللي مهدت لظهور جيل جديد من خدمات الإنترنت ومواقع التواصل الاجتماعي زي فيسبوك وتويتر.

Comments: