٧ كوارث ممكن يتسبب فيها عطل "فيس بوك"

13/03/2019

عطل مفاجئ أصاب "فيس بوك" و"إنستجرام" وتعطل جزئي في أبليكيشن "واتساب" قلب العالم كله واتصدر تريند "تويتر"، وحالة من الترقب ممكن توصل لدرجة الخوف بيعيشها الناس بسبب حرمانهم من الشبكة الاجتماعية الأولى في العالم، واللي وصل استخدامهم ليها لدرجات إدمانية، إحنا في "ذا جلوكال" رصدنا 7 كوارث ممكن تهدد البشر لو استمر عطل "فيس بوك" و"إنستجرام" للأبد:

1- مش هتعرف تـ stalk الإكس

الزيارة الدورية كل 35 دقيقة لأكونت الإكس على "فيس بوك" و"إنستجرام" اللي بتخليك تعرف هو/هي فين النهاردة، عملوا إيه، قابلوا مين، مبسوطين ولا حزانى، هتحس إنك منعزل وهتموت على معلومة مش لاقيها، ولو العطل طوّل هتضطر ترجع للطرق التقليدية في إنك تسأل صحابها والمقربين منها، وفي الآخر هتتكشف.
 

2-  أرشيف حياتك

آلاف الرسايل المؤثرة بينك وبين صحابك، الكلام الحلو والمواقف المحكية، الصور القديمة، الحاجات اللي بترجع لها بسهولة لما تعمل سيرش في الـ Chat بينكم، "فيس بوك" كمان بيفكرك إمتى اتصاحبت على فلان وإمتى اتعرفت على فلانة، أول صورة بينكم، الـ Posts القديمة اللي بترجع لها وبتكتشف قد إيه اتغيرت، أو على الأقل بتسترجع ذكريات الفترة، كل ده هيروح.
 

3- لو شغال في الـ Social Media

"فيس بوك" هو أكتر شبكة اجتماعية بتُستخدم في مصر، ومؤخرا بيزنس المحتوى والإعلانات والديجيتال عموما بقى بيضم عدد ضخم جدا من العاملين، سواء في إدارة الحسابات أو في صناعة المحتوى أو صورته الفنية، ما يعني خراب بيوت الناس دي.
 

4- الـ Saved Articles

عشرات اللينكات والمقالات ورسايل الدكتوراه اللي كنت عاملها Save، تجميعات الكورسات ودوواين محمود دراويش، كلها هتضيع عليك، الحقيقة إنك مكنتش هتقرب لها في حياتك بس إحساس الفقد عموما وحش.
 

5- مش هتعرف توجه رسايلك المقصودة

في غياب "فيس بوك" و"إنستجرام" مش هتعرف توجه رسايل مقصودة وتتأكد إنها وصلت للمرسل إليه زي ما بتحط "ستوري" على "إنستجرام" وتتأكد إن الشخص المستهدف شافها، مش هيتبقى ليك غير ستوري "واتساب" ودي وسيلة أصعب وأعقد ومحدش بياخد باله منها اليومين دول.
 

6- هتخسر الإعلانات

الحلة التيفال والشواية الزنك والبراد المنجنيز والفنجان الفوسفاتي والشطافة المحمولة وكولدير المياه أبو غمازات، كل دي حاجات كنت/ كنتي بتتكلموا عنها مع المحيطين بيكم وعايزين تشتروهم، كانوا بيطلعوا فورا في إعلانات مقترحة على "فيس بوك" بناءً على لوغاريتمات معينة، الإعلانات دي هتفتقدوها ومش هتلاقوا حد يسهل عليكم الجري ورا رغباتكم الاستهلاكية في غياب "فيس بوك".
 

7- الجروبات

جروبات زي "كيف نربي أولادنا" و"سكان الرحاب" و"أمهات المنصورة" و"رجالة المعمورة" و"جمهور المقصورة"، واللي بتجمع عدد من المهتمين بنفس الموضوع أو ولاد المنطقة/ المدرسة/ الدفعة الواحدة للأسف مش هتكون موجودة.

Comments: