في اليوم العالمي للكلى: اعرف إزاي تحافظ على "سلامة كلاويك"

14/03/2019

يوم 14 مارس هو اليوم العالمي للكلى، تقريبا عدد الأشخاص سنويا اللي بيعانوا من أمراض بسبب الكلى 850 مليون شخص، ده غير إنها بتبقى سبب في وفاة 2.4 مليون شخص سنويا في العالم، وإصابات الكلى الحادة هي أهم الأسباب اللي بتسبب أمراض الكلى المزمنة اللي بتصيب 13 مليون شخص في العالم كل سنة.

أمراض الكلى المزمنة ناتجة من العوامل الاجتماعية اللي بيحاط بيها الشخص من وقت ولادته، ومنها مستوى الفقر والتمييز الجنسي ونقص التعليم والمخاطر المهنية والتعرض للتلوث، وفيه أسباب تانية زي إن 58% من الحالات المصابة بأمراض الكلى الحادة واللي بتسبب قصور كلوي موجودة في الدول اللي دخل الفرد فيها متدني أو متوسط، في حين إن أمراض الكلى ممكن الوقاية منها عن طريق التوعية المجتمعية، من أهم نصايح التوعية للحفاظ على الكلى سليمة:

1- حافظ على الوزن المثالي:

الحفاظ على الوزن المثالي من أهم العوامل اللي هتحافظلك على صحة سليمة بشكل عام وهتحافظ على الكلى بشكل خاص، لإن من المعروف بشكل عام إن الوزن الزيادة بيسبب أمراض مزمنة زي الضغط والقلب والشرايين وأمراض السكر وكلها أمراض مرتبطة بخطر الإصابة بالكلى ومشاكل التأثير على شعيراتها الدموية، عشان كده لازم تحافظ على وزنك المثالي.

2- خلى نمط حياتك صحي وحافظ على العادات الغذائية السليمة:

حاول تتجنب الأغذية اللي فيها دهون مشبعة ونسب عالية من السكريات البسيطة والأملاح، ركز على الكربوهيدرات المعقدة والحبوب الكاملة، كل في اليوم 5 وجبات صحية يكون فيهم خضار وفاكهة، حاول ماتفوفتش وجبة الفطار، حاول تمارس نشاط بدني لمدة 15 دقيقة أسبوعيا.

3- اتجنب استهلاك الموالح وحدد كمية البروتينات:

أكتر نوعين من العناصر الغذائية ممكن يسببوا أذى للكلى هما البروتينات والأملاح، زيادة نسبة البروتينات في النظام الغذائي لفترة طويلة هتعرض الكلى لأذى عشان كده خد بالك من كمية البروتينات اللي بتستهلكها في يومك، أما بالنسبة للأملاح فهي مصدر أساسي للصوديوم اللي بيرفع ضغط الدم في الجسم ومعروف إن الضغط هو المسبب الأساسي لأمراض الكلى، عشان كده حاول على قد ما تقدر تتجنب الأملاح والمخللات والملح نفسه والجبن واللحوم.

4- اشرب مياه بكميات كفاية في اليوم:

المتعارف عليه إن المياه هي أهم عنصر للجسم وللكلى خصوصا لإنها عنصر مهم وفعال لصحة الكلى، شرب كميات من المياه من 2 لـ 3 لتر يوميا بيضمن إن الكلى هتقوم بوظيفتها بالظبط، ومعروف إن لازم الشخص يعوض الجسم عن كميات المياه اللي بيفقدها خلال اليوم سواء في المجهود البدني أو بسبب الجو أو أي أسباب تانية عشان مايصابش الجسم بالجفاف وتتأذي الكلى.

Comments: