نماذج عربية مشرفة من أصحاب متلازمة "داون"

21/03/2019

يوم 21 مارس من كل سنة هو اليوم العالمي لمتلازمة داون، أصحاب متلازمة داون بيشوفوا العالم من زاوية تانية بتخليهم مميزين لكن لو عندهم الفرصة خصوصا في الرياضة أو المجال الفني وفي مجالات الخدمات العامة والإدارة زي ما قال Parnet24.

وبمناسبة اليوم العالمي لمتلازمة داون قررنا نعرض لكم أبرز أصحاب متلازمة داون اللي حققوا نجاح:

1- رحمة خالد: أول مذيعة

رحمة خالد عندها 22 سنة وخريجة كلية سياحة وفنادق، كان نفسها تبقى مذيعة وفعلا عملت ده بتقديم برنامج "8 الصبح" في قناة Dmc، ده غير إنجازاتها في الرياضة، حصلت على 170 ميدالية في مشاركتها في بطولات مختلفة من التنس للسباحة لكرة السلة.

2- كرمة هاني: متسابقة الجمباز

مسابقة «Special Olympics Egypt» في تصفياتها في أبو ظبي السنة دي المتسابقة المصرية كرمة هاني 16 سنة مشاركة فيها بالرغم من صعوبة التدريبات بسبب مشاكل صعوبة التوازن اللي بيعاني منها أصحاب متلازمة داون إلا إنها بالتدريبات الكتير قدرت تتحكم فيها، وده اللي أظهر تفوقها، وبقت أول صاحبة متلازمة داون تشارك في الأولمبياد الخاصة المصرية.

3- هبة الشرفا: أول مدرسة

اتولدت في 11 نوفمبر 1989 في رأس الخيمة وفي سنة 1995 انتقلت لغزة مع أهلها، وفي سن 26 بقت هبة أول مدرسة لمتلازمة داون في قطاع غزة، بتدرس للصف الأول والتاني في جمعية "الحق في الحياة" في غزة.

4- دينا جلال: بطلة العالم في الأوليمبياد الخاصة

عازفة البيانو دينا جلال بدأت مشوارها مع الأوليمبياد الخاصة المصرية كلاعبة قوى، وحصلت دينا على المركز الأول على أفريقيا، سجل دينا حافل بالبطولات أهمها لقب ضيف الشرف على مستوى العالم سنة 1995 في أمريكا، وكأس المستقبل في أمريكا، وفي 2003 تم اختيارها كمتحدث رسمي لمنطقة الشرق الأوسط.

5- دينا ومحمود: أبطال السباحة

دينا ومحمود أبطال مصر في السباحة، كل واحد منهم حصل على ميداليات وجوايز عالمية كتير في السباحة، واتطورت قصة حبهم لما سافروا لإيطاليا عشان يمثلوا مصر في بطولة العالم، دينا فازت بالميدالية البرونزية، ومحمود فاز بالميدالية الذهبية والبرونزية، وبعد رجوعهم لاحظوا أهلهم إنهم مستمرين في الكلام فقرروا إنهم يساعدوهم ويدعموا علاقتهم واتخطبوا.

دينا حاليا شغالة مساعد مدرس وهي بطلة في التنس الأرضي، وعرضت فساتين فرح في أتيلية خيري.

Comments: