٨ خطوات للتخلص من مشكلة "الخوف من الرفض"

27/03/2019


الخوف غريزة في كل البشر ويمكن دافع مهم بيحركنا ناحية أفعال كتير في يومنا وفي حياتنا عموما، بس المغزى من دافع الخوف هو إن الشخص يفضل آمن ومنتبه لسلامته، لكن الخوف من الرفض يمكن أكتر نوع خوف بيوقف الواحد قدام خطوات مهمة عشان بيحط احتمالية إنه ممكن يترفض، الخوف من الرفض ممكن يبقى في الشغل وفي العلاقات وفي الصداقة وده اللي بيفرض على الشخص في وقت معين إنه يتغير ويحاول يتخلص من الصفة دي.

الخوف من الرفض سببه إن الشخص بيكون مستني الحب والتقبل غير المشروط من اللي حواليه وده شيء غير منطقي، كفاية إن الواحد يركز مشاعره وطاقته على الأشخاص اللي بيقبلوه ويحبوه، والخوف من الرفض بيبقى نتيجته إن الواحد بيدخل نفسه في صراعات ومقارنات غير منطقية مع الناس حتى لو الناس دول ماكنوش في نطاق حياته الحقيقي.

وعشان تتخلص من الخوف من الرفض دي لازم تتبع شوية خطوات عرفناهم من Wikihow هتساعدك تتخلص من الخوف من الرفض:

1- أول خطوة عشان تتخلص من الرفض هي إنك تحافظ على هدوءك العقلي ويبقى عندك خطة عشان تتخلص من الخوف من الرفض، بمعنى إن لو حد فعلا رفضك أو رفض طلب ليك اتعامل مع الأمور بعقلك وبلاش تنجرف لمشاعرك وردود الفعل المتهورة.

2- حدد الحاجات اللي ممكن تقول فيها "يا آخد كل اللي عايزه يا بلاش" زي لو ماشتغلتش في المكان ده أنا كده أبقى فاشل أو عديم القيمة، وافتكر إنجازات قديمة إنت عملتها زي إنك قبل كده اشتغلت في مكان معين وحققت نجاحات معينة وده اللي بيساعدك يبقى عندك سي في كويس تقدر تقدم بيه على وظايف تانية كويسة.

3- خلي في اعتبارك إن الرفض شيء محتمل، وكونك خايف منه أصلا يعني إنت مؤمن بوجوده، لو اتقدمت لشغل واترفضت تمام فيه 100 شخص تاني قدموا، ولو طلبت مع حد إنكوا تخرجوا سوا فيه احتمال أصلا 50% يوافق و50% يرفض، خليك عارف إنك مش هتقدر تتحكم في رأي كل الناس فاعمل اللي عليك لإن ده بس اللي ممكن تتحكم فيه الباقي محدش يقدر يتحكم فيه غير اللي بأيدهم الرفض أو القبول.

4- اتعامل بروح رياضية مع الرفض، طبعا إننا نقول حاجة زي دي سهلة جدا مقارنة بتنفيذه، لكن لما تنفذه دي هيفيدك في المستقبل وهيفيد سلامك النفسي فبدل الإنفجار والغضب مع الرفض اتعامل معاه بمرونة، وكل ما قدرت تتكيف مع الرفض أحسن كل ما هتعرف تتخلى عن الخوف من الرفض، زي مثلا لو طلبت من حد تخرج معاه في دايت ورفض فإنت ممكن تقوله إنك "بتحترم رغبته الشخصية ومتفهم جدا وتشكره" وده هيديك مساحة إنك تبان شخص ناضج أكتر.

5- اعرف معنى الرفض الموضوعي، لإن مش معنى إنك اترفضت من شركة معينة يبقى إنت كده شخص مرفوض بصفة عامة، وماتخليش مشاعر الرفض تشكلك أي مشاعر تشكيك في قدراتك.

6- ممكن تبص للرفض بنظرة إيجابية على إنه فرصة تانية، وممكن تفتكر المثل اللي بيقول إن "لو باب اتسد بيتفتح قدامه ألف باب" ممكن ماتكونش قادر تفتكر الكلام ده وقت الرفض، بس هتفتكره بعد كده، خصوصا لو حصل معاك ولقيت إن الرفض اللي حصلك قبل كده كان سبب إن مكانك دلوقتي أحسن.

7- خليك مؤمن بنفسك لإن ممكن الخوف من الرفض أو الرفض نفسه ينعكس عليك بإن ثقتك في نفسك بتقل، فلما تفكر في نفسك بنظرة عين أو تفكير الناس التانيين ده هيبقى معناه إنك فكرتك عن نفسك تحت رحمة الناس.

8- استعرض نقط قوتك لإننا بنكون عرضة أكتر للخوف لما مابنعرفش قيمتنا، اكتب قايمة بنقاط قوتك عشان تظهر قيمتك قدام نفسك.

Comments: