جلوكال Gossip.. هل أحمد سعد هو صاحب قرار الانفصال عن سمية الخشاب؟

28/03/2019

النهاردة الصبح الفنان أحمد سعد صحي من النوم الساعة 6 الصبح، حط صورة ولاده على الفيسبوك وكتب عليها "كابشن" وقال "أنا قررت الإنفصال عن الفنانة سمية الخشاب..، اتمنى لها السعادة والتوفيق واتمنى ربنا يقدرني على الحب والعطاء لأغلى حاجة عندي..، أولادي".

في أخر حوار للمصري اليوم مع سمية الخشاب من أسبوعين قالت فيه إن جوازها من أحمد سعد عطلها عن شغلها لمدة سنتين وأخر مسلسل عملته فعلا كان مسلسل "الحلال" سنة  2017، وأخر أغنية قدمتها كانت السنة دي واسمها "بتستقوى".

سمية الخشاب من أكتوبر 2017 "وقت جوازهم" كانت بتسافر مع أحمد سعد في كل حفلاته تقريبا ماعدا أخر حفلة له في دبي، وسافر لوحدة بسبب إنها كانت مشغولة بترويج أغنية "بتستقوى" واللي نشرتها في اليوم العالمي للمرأة، والأغنية موجهة للراجل اللي بيضرب مراته أو بيهنها، وفي أول الكليب كان فيه جملة اتكتبت " "كل الاحترام والتقدير للرجل الذي يحترم وجود وقيمة ومكانة المرأة في الحياة".

عموما سمية الخشاب رجعت تظهر تاني في لقاءات ورجعت تاني للغنا وأخر ظهور ليها كان من أسبوع مع رضوى الشربيني وقالت فيه إنها ماتتخنش، فهل الأغنية وظهورها من تاني هو سبب مشاكلها مع أحمد سعد؟ ولا مشاكلها مع أحمد سعد هى كانت الدافع اللي خلاها ترجع تاني للظهور؟ بما إنها كانت صرحت من أسبوعين في حوار المصري اليوم إنها مش هتدي بيتها اهتمام تاني الفترة اللي جايه لإنها فنانة ومش ملك نفسها، وعندها جمهور كفنانة ومطربة وليهم حق عليها وكفاية إنها اتعطلت سنتين بسبب الجواز.

والغريب اللي كل الناس علقت عليه إن أحمد سعد كتب البوست الصبح بدري جدا فهل هو عايز يسبق قبل ما الخبر يطلع من سمية الخشاب؟ ودي ممكن تبقي كدبة أبريل وبيشتغلونا كلنا؟

بس طبعا الفنانة ريم البارودي مافوتتش الخبر ده وكان لازم تعلق عليه، فكتبت على صفحتها الرسمية على الفيسبوك "يمهل ولا يهمل"

Comments: